Turkiyada Facebook foydalanuvchilarning fotosuratlari tarqalib ketganligi tufayli jarimaga tortildi

Turkiya shaxsiy ma'lumotlarni himoya qilish boshqarmasi (KVKK) Facebook’ni foydalanuvchilarning shaxsiy fotosuratlari ommaga tarqalib ketganligi sababli 1,65 million lira (270 ming dollar) jarimaga tortdi.

Boshqarmaning ma'lum qilishicha, 2018 yilning 13 sentyabridan 25 sentyabrigacha Facebook foydalanuvchilarining shaxsiy fotosuratlari uchinchi shaxslar uchun ochiq bo‘lgan. Qayd etilishicha, KVKK Facebook vakillariga ogohlantirish jo‘natgan. 

"Ammo ulardan javob kelmadi, natijada mazkur qoida buzishlar bo‘yicha surishtiruv ishlari boshlandi. Boshqarma qarori bilan ijtimoiy tarmoq chora ko‘rmagani uchun 1 million, Facebook tomonidan qoida buzilishlar haqida axborot berilmagani uchun yana 550 ming lira jarimaga tortildi", - deyiladi boshqarma xabarida.

KVKK ma'lumotiga ko‘ra, mazkur qoida buzilish natijasida Turkiyadagi 300 mingga yaqin foydalanuvchi jabrlangan bo‘lishi mumkin.