Belarus va O‘zbekiston milliy savdo qonunchiligini uyg‘unlashtirishi lozim. Bu haqda Belarus respublikasi kengashi raisi Mixail Myasnikovich Minskda boshlangan O‘zbekiston — Belarus hududlararo forumi ochilishi marosimida fikr bildirdi.
U ikki tomonlama hamkorlikni faollashtirish bo‘yicha qator takliflarni ilgari surdi. Mixail Myasnikovich "savdo munosabatlarini tartibga soluvchi milliy qonunchiliklarni uyg‘unlashtirish kerakligini" aytdi.
Myasnikovich parlamentlararo va hukumatlararo komissiyalarga Belarus-O‘zbekiston shartnomaviy-huquqiy bazasini tahlil qilish, uni to‘ldirish va faollashtirishni taklif qildi.
Eslatib o‘tamiz, O‘zbekiston prezidenti Shavkat Mirziyoyev Belarus prezidenti Aleksandr Lukashenkoning taklifiga binoan 31 iyul — 1 avgust kunlari rasmiy tashrif bilan ushbu mamlakatda bo‘ladi.
Oliy darajadagi O‘zbekiston-Belarus muloqotining davomi sifatida Minsk shahrida siyosiy, savdo-iqtisodiy, investitsiyaviy, madaniy-gumanitar va boshqa sohalardagi ikki tomonlama hamkorlikning holati va istiqbollarini, shuningdek, mintaqaviy va xalqaro ahamiyatga molik dolzarb masalalarni muhokama qilish rejalashtirilgan.
