O‘zbekiston mudofaa vaziri Moskvada g‘olib tankchilarni qutladi

3 avgustdan 17 avgustga qadar davom etgan beshinchi Xalqaro armiya o‘yinlarida O‘zbekiston Mudofaa vazirligi harbiy xizmatchilari munosib ishtirok etdi, deb xabar berdi Mudofaa vazirligi Axborot va ommaviy kommunikatsiyalar departamenti. Xususan, “Tank biatloni” musobaqasining 2-divizionida ilk bor qatnashgan vakillarimiz barcha raqiblarini ortda qoldirib, birinchi o‘rinni qo‘lga kiritdi.

O‘zbekiston mudofaa vaziri general-mayor Bahodir Qurbonov armiya o‘yinlarining yopilish marosimida ishtirok etish uchun Rossiya Federatsiyasiga tashrif buyurdi. Mudofaa vaziri yurtimiz sharafini munosib himoya qilgan “Tank biatloni” jamoasi bilan uchrashib, ularni qizg‘in muborakbod etdi.

– Sizlarni nufuzli musobaqada yuksak marrani egallab, davlatimiz bayrog‘ini baland ko‘targaningiz bilan qutlayman! Sizlar haqiqiy vatanparvarlarsiz! O‘zbekning quch-qudrati, mahorati va hech kimdan kam emasligini yana bir bor isbotladingiz! Sizlar bilan butun O‘zbekiston faxrlanadi!

Shundan so‘ng mudofaa vaziri general-mayor Bahodir Qurbonov Rossiya mudofaa vaziri armiya generali Sergey Shoygu hamrohligida “Do‘stlik uyi”da tashkil etilgan, mamlakatimiz haqida yetarlicha taassurot uyg‘otadigan O‘zbekiston Respublikasi ko‘rgazmasi bilan tanishdi.

Xalqaro armiya o‘yinlarining yopilish marosimi “Tank biatloni” musobaqasining 1-divizion final bahsidan so‘ng Moskva viloyatidagi “Patriot” parkida bo‘lib o‘tadi.