Qurilish-pudrat tashkilotlari assotsiatsiyasi tashkil etiladi

Normativ-huquqiy hujjatlar loyihalari muhokamasi portalida “Qurilish-pudrat tashkilotlar faoliyatini takomillashtirish chora-tadbirlari to‘g‘risida”gi prezident qarori loyihasi e'lon qilindi.

O‘zbekiston Respublikasi Vazirlar Mahkamasi Qurilish-pudrat tashkilotlari assotsiatsiyasini tashkil etadi va Assotsiatsiya nizomini ishlab chiqib, tegishli tartibda tasdiqlaydi.

Assotsiatsiyaning asosiy vazifalari etib quyidagilar belgilanadi:

qurilish-pudrat tashkilotlarining talabiga muvofiq ular faoliyatini ISO-9001 xalqaro standartga mos ravishda rivojlantirishga qaratilgan dasturiy qo‘llanmalar ishlab chiqish va tarqatish;

qurilish-pudrat tashkilotlariga ISO-9001 xalqaro sertifikatini olish uchun ko‘maklashish;

xorijiy davlatlarning qurilish normalari va qurilish ishlarini olib borish tartiblarini o‘rganib chiqqan holda, xorijiy davlatlarda o‘tkaziladigan tender savdolarida qurilish-pudrat tashkilotlarining qatnashishi uchun ko‘rsatma va yo‘riqnomalar ishlab chiqish;

qurilish-pudrat tashkilotlarining mutaxassis va xodimlarini sohada ilg‘or qurilish texnologiyalarini tatbiq qilish uchun xorijiy davlatlarning yetakchi qurilish-pudrat tashkilotlariga malaka oshirishini hamda o‘quv kurslariga yuborilishini tashkil etish;

qurilish-pudrat tashkilotlarining ishchilarini ixtisoslashtirilgan kasb-hunar kollejlarida tashkil etiladigan malaka oshirish kurslarida va sayyor o‘quv kurslarida o‘qitilishini tashkil etish;

qurilish-pudrat ishlari sohasida yangiliklarni tatbiq qilish bo‘yicha hududiy va respublika miqyosidagi seminarlarni tashkil qilish;

qurilish-pudrat tashkilotlari bilan tuzilgan shartnoma asosida huquqiy xizmat ko‘rsatish;

qurilish-pudrat xizmatlari sohasidagi normativ-huquqiy hujjatlarni ishlab chiqishda ishtirok etish;

litsenziya olish uchun zaruriy hujjatlarni to‘plash va taqdim etishga ko‘maklashish;

obektlarning qurilish-montaj ishlarini bajarish bo‘yicha tender savdolarida ishtirok etish qurilish-pudrat tashkilotlariga zaruriy hujjatlarni to‘plash va taqdim etishga ko‘maklashish;

Respublika va hududiy shaharsozlik kengashlari yig‘ilishlarida, hokimiyat, sud va huquqni muhofaza qiluvchi organlarda ko‘riladigan masalalarda qurilish-pudrat tashkilotlarining manfaatlarini himoya qilish.

Assotsiatsiya faoliyatining asosiy moliyalashtirish manbalari etib quyidagilar belgilanadi:

ixtiyoriy a'zolik asosida qurilish-pudrat tashkilotlaridan olinadigan badallar;

qurilish-pudrat tashkilotlari bilan tuzilgan shartnomaga muvofiq ko‘rsatiladigan xizmatlar uchun to‘lanadigan mablag‘lar;

xalqaro moliyaviy institutlar, xorijiy hukumat tashkilotlari va boshqa tashkilotlarning grantlari doirasida kelib tushadigan mablag‘lar;

o‘z mablag‘lari va qonunchilik bilan taqiqlanmagan boshqa manbalar.