“Dacha”larning elektron bazasini yaratish va ijara narxlarini nazorat qilish rejalashtirilmoqda

Turizm sohasida yashirin iqtisodiyotni qisqartirish, xizmatlar shaffofligini ta’minlash va raqamli hisobga olish tizimini joriy etish chora-tadbirlari to‘g‘risidagi prezident qarori jamoatchilik muhokamasiga qo‘yildi.

Soliq qo‘mitasi tomonidan ishlab chiqilgan loyihaga ko‘ra, turizm sohasida faoliyat yuritayotgan barcha joylashtirish vositalarini, shu jumladan dala hovlilarning yagona elektron bazasi yaratilishi belgilanmoqda.

Jismoniy yoki yuridik shaxslarga tegishli bo‘lgan, mijozlarga vaqtinchalik joylashtirish va qo‘shimcha xizmatlar ko‘rsatish uchun foydalaniladigan yakka tartibdagi turar joy yoki hovli-joylar joylashtirish vositalari deb e’tirof etiladi. Bunda turistik dala hovlilarga joylashgan mijozlardan turistik yig‘im undirilmaydi va turistik dala hovlilarda xizmat ko‘rsatish uchun alohida litsenziya yoki ruxsatnoma olish talab etilmaydi.

2027 yil 1 yanvardan joylashtirish vositalari tomonidan ko‘rsatiladigan xizmatlarning narxini Milliy turizm yagona platformasiga doimiy kiritib borish majburiy hisoblanadi.

Turizm qo‘mitasi Soliq qo‘mitasi bilan birgalikda uch oy muddatda platformaga kiritilmagan joylashtirish vositalari va turistik dala hovlilar tomonidan amalga oshirilayotgan noqonuniy faoliyat to‘g‘risida soliq organlarining axborot tizimi orqali xabar bergan jismoniy shaxslarga, ushbu ma’lumotlar asosida o‘tkazilgan tekshiruv natijalariga ko‘ra huquqbuzarlik aniqlangan taqdirda, undirilgan jarima summasining 30 foizi miqdorida mukofot puli to‘lash tartibini ishlab chiqib, Vazirlar Mahkamasiga kiritadi. 

Noqonuniy faoliyat yuritayotgan shaxslar va obektlar to‘g‘risida xabar bergan fuqaro shaxsini sir saqlanishini ta’minlanadi xamda jarimaning qolgan undiriladigan qismi belgilangan tartibda taqsimlanadi.

Loyiha muhokamasi 2026 yil 7 maygacha davom etadi.