Liviyaga «Vagner» xususiy harbiy kompaniyasining yuzdan ortiq jangchilari kelgani xabar qilindi

Sentabr boshlarida "Vagner" xususiy harbiy kompaniyasining yuzdan ortiq jangchilari general Xalifa Xaftarning Liviya milliy armiyasini (LMA) qo‘llab-quvvatlash uchun Liviyaga kelgan, deb xabar qildi Bloomberg agentligi o‘z manbalariga tayanib.

Agentlik suhbatdoshlarining ma'lumot berishicha, "Vagner" jangchilari LMAga Tripoli hududidagi jangovar harakatlarda yordam beradi. Xabarda aytilishicha, "Vagner" jangchilari Liviyada jang qilmoqda va ayrimlari halok bo‘lgan.

LMA vakili esa mazkur armiya safida na Rossiya va na boshqa xorijiy davlat jangchilari borligini ma'lum qildi.

Liviyada qo‘shhokimlik saqlanib qolmoqda: mamlakat sharqida, Tobruk shahrida parlament, g‘arbda, Tripolida esa BMT qo‘llab-quvvatlovi ostida tashkil etilgan hukumat hukmronlik qilmoqda. 

2019 yil martda The Daily Telegraph nashri o‘z manbasiga tayanib, Liviyaning Bengazi shahrida 300ga yaqin rossiyalik jangchi borligini xabar qilgandi.