Moldova sobiq prezidenti mamlakatdan 1 mlrd yevro olib chiqib ketilishi bilan bog‘liq jinoyatga aloqadorligini rad etdi

Mamlakat banklaridan 1 mlrd yevro olib chiqib ketilishi bilan bog‘liq jinoyat ishi bo‘yicha so‘roq qilingan Moldova sobiq prezidenti Pyotr Luchinskiy bu jinoyatga aloqadorligini rad etdi.

"Bu vaziyatda kimgadir natija emas, shov-shuv, ko‘proq jarangdor nomlar kerakligi ko‘rinib turibdi. Men bu ishga har qanday tarzdagi aloqadorligimni rad etaman", - dedi u Ipn.md agentligiga bergan bayonotida. Luchinskiy o‘g‘irlikka aloqador banklardan kredit olmaganini, ularda hisobraqamlari bo‘lmaganini ta'kidladi.

"Bo‘lib o‘tayotgan barcha voqealardan bir narsaga ishonmoqdaman – bu mening oilamga qarshi kampaniya. Ruminiyada o‘g‘lim Sergeyni ta'qib qilishdan boshlandi, keyin Kirillga o‘tishdi, endi esa menga. Ular nomimni qora qilishmoqchi, lekin haqiqat tantana qiladi", - dedi Luchinskiy.

Sobiq prezidentning to‘ng‘ich o‘g‘li Sergey Luchinskiy 2015 yilda rumin biznesmenidan shantaj va tovlamachilik yo‘li bilan 1 mln yevroni o‘zlashtirib olganlikda ayblanib Ruminiyada qo‘lga olingandi. Keyinroq u uy qamog‘iga o‘tkazilgan, so‘ngra ozodlikka chiqqandi. Kichik o‘g‘li Kirill esa o‘tgan yili pul yuvishda ayblanib 5,5 yilga qamalgan va mol-mulki musodara qilingandi.