Qoʻshimcha funksionallar
-
Tungi ko‘rinish
Moldovada Ukraina chegarasi yaqinida qulagan dron topildi
Moldova hukumati ma’lum qilishicha, Ukraina chegarasida aniqlangan Rossiyaning “Geran-2” uchuvchisiz apparati nazorat ostidagi portlatish orqali zararsizlantirilgan.
Moldova Chegara politsiyasi Ukraina chegarasidan 500 metr uzoqlikda, Tudorovo aholi punkti yaqinida samolyot turidagi qulagan uchuvchisiz apparatni topdi. Bu haqda 17 mart, seshanba kuni Kishinyovdagi Moldova hukumati rasmiy Telegram-kanalida xabar qilindi.
Ko‘zdan kechirishdan so‘ng, qurilma faol holatda ekani va portlovchi mexanizm bilan jihozlangan bo‘lishi mumkinligi ma’lum bo‘ldi. Mahalliy aholi evakuatsiya qilinganidan keyin politsiyaning portlovchi moddalar va texnika bo‘limi mutaxassislari “eng yuqori xavfsizlik sharoitida” nazoratli portlatish o‘tkazdi.
Codru bataloni muhandislari Bosh politsiya inspeksiyasi mutaxassislari bilan birgalikda ushbu dronni “Geran-2” deb aniqladi. Bu — Eronning Shahed turidagi dronining Rossiya versiyasi hisoblanadi. Moldova hukumati bildirishicha, apparat ichida aholi uchun xavf tug‘diradigan portlovchi moddalar bo‘lgan.
Moldova prezidenti Mayya Sandu bu hodisani mamlakat havo hududining “jiddiy buzilishi” va uning fuqarolariga tahdid deb atadi.
“Rossiya suverenitetimizni yana bir bor buzmoqda va odamlarimizning hayotini xavf ostiga qo‘ymoqda”, — deb yozdi u X tarmog‘ida.
