20:35 / 18.02.2020
0
22789
Ухандаги шифохона бош шифокори коронавирусдан вафот этди

Янги коронавирус ўчоғи ҳисобланган Хитойнинг Ухан шаҳридаги шифохоналардан бирининг бош шифокори коронавирусдан вафот этди. У Хитойдаги тиббиёт муассасаларининг коронавирусдан вафот этган илк раҳбари бўлди.

Фото : NEW YORK TIMES

Бу ҳақда Хитой марказий телевидениеси маълум қилди.

“Учан” шифохонаси бош шифокори Лю Чжиминнинг ҳаётдан кўз юмгани ҳақида дастлаб “Жэньминь Жибао” нашри хабар қилган, бироқ кейинроқ бу маълумот рад этилиб, шифокорлар унинг ҳаёти учун курашаётганлари маълум қилинган. 

Лю Чжимин /Фото: Red Star News

51 ёшли шифокор 18 февралда маҳаллий вақт билан соат 10:30да вафот этган. У Хитойдаги тиббиёт муассасаларининг коронавирусдан вафот этган илк раҳбари бўлди.

“Учан” коронавирусга чалинганларни биринчилардан бўлиб қабул қила бошлаган. Шифохонада мингга яқин одам ишлайди. 

Таъкидланишича, шифокор бош чаноқ-мия жароҳатлари, бош чаноқ ичи ўсимталари диагностикаси ва уларни даволаш билан шуғулланган. 

Уханда февраль бошида коронавирус тарқалиши ҳақида биринчи бўлиб хабар қилган 34 ёшли шифокор Ли Вэньлян ҳаётдан кўз юмганди. У шаҳарнинг марказий шифохонасида ишлаб, иш вақтида вирусни юқтириб олган. Шифокор 2019 йил 30 декабрда WeChat ижтимоий тармоғи орқали ҳамкасбларига Ухандаги Хуанань денгиз маҳсулотлари бозорида атипик зотилжамга (SARS) учраш ҳолатлари қайд этилгани ҳақида хабар қилган.

31 декабрда Ли ва касаллик ҳақида бошқалар билан бўлишган яна 7 шифокор полицияга чақиртирилиб, уларга жамоат тартибига путур етказиши мумкин бўлган бундай “ёлғон хабарлар”ни бошқа тарқатмаслик бўйича огоҳлантириш қилинган.

Мавзу
Коронавирус
2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.
Барчаси
Ушбу хабарга фикрингизни билдиринг. Бунинг учун авторизациядан ўтишингиз керак!
Top