FVV Buxorodagi yong‘in haqida qo‘shimcha ma'lumot berdi

Favqulodda vaziyatlar vazirligi Buxoro viloyatida savdo binolarida sodir bo‘lgan yong‘in haqida qo‘shimcha ma'lumot taqdim etdi.
 
Joriy yilning 26 fevral kuni soat 22:37da Buxoro shahar B.Naqshband ko‘chasida joylashgan savdo binolarida yong‘in sodir bo‘layotganligi haqida yong‘in-qutqaruv xizmatiga xabar kelib tushgan.

Yong‘inni bartaraf etishga 15 ta asosiy, 2 ta maxsus yong‘in o‘chirish avtomobillari va 20 tadan ortiq yordamchi texnikalar jalb qilinib, soat 00:40da yong‘inni tarqalishi oldi olindi va soat 01:30da batamom o‘chirildi.

Yong‘in maydoni 520 kv.m.ni tashkil etdi. Yong‘in natijasida halok bo‘lganlar va tan jarohati olgan shaxslar mavjud emas.

“Hurmatli fuqarolar, yong‘in xavfsizligi qoidalariga rioya qilishingizni so‘raymiz”, - deyiladi ma'lumotda.

Avvalroq, Buxoroda yirik yong‘in sodir bo‘lgani xabar berilgandi.