Yangi institut va kolleksiya, 50 mlrd so‘mlik tanlov hamda qo‘shimcha qabul: Prezident kimyo va biologiyaga aloqador qaror imzolaydi

kimyo yo‘nalishida yuqori malakali ilmiy va ilmiy-pedagog kadrlar tayyorlash samaradorligini oshirish, kadrlar malakasini oshirish va qayta tayyorlash tizimini yanada takomillashtirish;

kimyo yo‘nalishida yosh iqtidorli olimlarni tayyorlash va ularni ilm-fanga keng jalb qilish maqsadida o‘quv va o‘quv-ishlab chiqarish bazalarini rivojlantirish.

b) biologiya ilm-fanini yanada rivojlantirishning eng muhim yo‘nalishlari etib:

biologiya sohasidagi ustuvor fundamental, amaliy va innovatsion loyihalarni shakllantirish va amalga oshirish uchun shart-sharoitlar yaratish;

global ilmiy muhitga integratsiya qilish uchun ilmiy-tadqiqotlar darajasi va natijadorligini oshirish, shu jumladan yangi ilmiy yo‘nalishlarni rivojlantirish;

tuproq biologiyasi, fizikasi, mexanikasi, agrokimyosi va mikrobiologiyasiga oid tuproq unumdorligini oshirilish va monitoringiga yo‘naltirilgan zamonaviy tadqiqotlarni amalga oshirish;

global iqlim o‘zgarishlari sharoitlarida qishloq xo‘jaligi ekinlaridagi biokimyoviy va fiziologik o‘zgarishlarni keng tadqiq qilish, modellashtirish va shunga muvofiq yuqori temperaturaga, suv tanqisligiga, sho‘rlanishga va yangi paydo bo‘layotgan kasallik va zararkunandalarga chidamli genotiplar yaratish;

iqlim o‘zgarishining tirik organizmlarga ta'siri va atrof-muhitni muhofaza qilishga, shuningdek ularning issiqxona effekti oqibatlariga chidamliligini oshirish maqsadida o‘simliklar fiziologiyasi, genetik, genomik va biotexnologik tadqiqotlarni kengaytirish;

sog‘lom ovqatlanish va sog‘lom turmush tarzi fiziologiyasi sohasidagi tadqiqotlarni kengaytirish;

O‘zbekistonning dorivor o‘simliklar bazasini o‘rganish, ularning introduksiyasini rivojlantirish, noyob o‘simlik olami xilma-xilligi, mikrob uyushmalari, noyob yovvoyi hayvonlar turlarining milliy kolleksiyalarini qayta tiklash, mavjudlarini yangilash;

xalqaro standartlar asosida tabiiy biologik xilma-xillik obektlari bo‘yicha milliy biologik kolleksiyalarni shakllantirish, ularni saqlash sharoitlarini yaxshilash, raqamlashtirilgan ma'lumotlar bazasini yaratish hamda xalqaro ma'lumotlar bazalariga integratsiya qilish;

cho‘llashish bilan bog‘liq biologik taksonlarning klimatogenik dinamikasi va evolyutsiyasini o‘rganish hamda amaliy tavsiyalar ishlab chiqish;

“yovvoyi” tabiat fenomenlarini o‘rganish orqali “biologik dehqonchilik” rivojlanishini nazariy va amaliy tomonlarini talqin qilish maqsadida “tuproq-mikroorganizm-o‘simlik” triadasini tizimli o‘rganish bo‘yicha tadqiqotlarni keng yo‘lga qo‘yish;

molekulyar filogeniya va tizimlashtirishni, populyatsion genetika va biogeografiyani rivojlantirish;

DNK shtrix-kodlash va biologik xilma-xillik obektlarini genetik sertifikatlash;

mikobiotalarni tadqiq etish va biologik faollik mexanizmlarini o‘rganish;

biologiya fanlari sohasida kadrlar tayyorlash, malakasini oshirish va qayta tayyorlash tizimini yanada takomillashtirish.

Innovatsion rivojlanish vazirligi, Fanlar akademiyasi, Moliya vazirligi, Iqtisodiyot va sanoat vazirligi, Qishloq xo‘jaligi vazirligi, Sog‘liqni saqlash vazirligi, Energetika vazirligi, Oliy va o‘rta maxsus ta'lim vazirligi, “O‘zkimyosanoat” AJ, “O‘zbekneftgaz” AJ, “O‘zsanoatqurilishmateriallari” uyushmasining:

davlat ilmiy muassasasi shaklida yuridik shaxs maqomiga va zamonaviy infratuzilmaga ega bo‘lgan Yangi kompozit materiallar va zamonaviy kimyo texnologiyalari asosida innovatsion qurilish materiallari texnologiyalarini yaratish Milliy laboratoriyasini tashkil etish;

mineral resurslardan foydalanish samaradorligini oshirish maqsadida “O‘zbekko‘mir” AJ huzurida yuridik shaxs maqomiga ega bo‘lgan “Ko‘mir va materiallar kimyosi” ilmiy-tajriba laboratoriyasini tashkil etish, Fanlar akademiyasining Umumiy va noorganik kimyo institutida “Ko‘mir kimyosi va texnologiyasi” va O‘simlik moddalari kimyosi institutida “Nozik organik sintez va texnologiyasi” yangi ilmiy yo‘nalishlari faoliyatini yo‘lga qo‘yish;

“O‘zkimyosanoat” AJ va “O‘zbekneftgaz” AJ tizimidagi yirik korxonalar huzurida zamonaviy ilmiy-tahliliy asbob-uskunalarga ega bo‘lgan tajriba-ishlab chiqarish laboratoriyalarini tashkil etish asosida yuqori samarador kimyoviy texnologiyalarni tarmoq korxonalariga joriy etish ko‘lamini kengaytirish;

xo‘jalik boshqaruvi organlari va yirik davlat korxonalarining Innovatsion faoliyatni qo‘llab-quvvatlash jamg‘armalari mablag‘lari hisobidan to‘g‘ridan-to‘g‘ri venchur moliyalashtirish mexanizmi asosida yuqori samarador kimyoviy texnologiyalarni ishlab chiqarishga joriy etishga qaratilgan innovatsion tadbirkorlik sub'yektlarini (sho‘'ba korxonalarini) tashkil etish;

Genetika va o‘simliklar eksperimental biologiyasi institutining “G‘o‘za genofondi kolleksiyasi” noyob ilmiy obekti negizida davlat ilmiy muassasasi shaklida yuridik shaxs maqomiga ega bo‘lgan Fanlar akademiyasi huzurida Milliy g‘o‘za genofondi kolleksiyasi markazini tashkil etish;

Mikrobiologiya institutining “Sanoat ahamiyatiga ega mikroorganizmlarning shtammlari kolleksiyalari”, Genetika va o‘simliklar eksperimental biologiyasi institutining “Fitopatogen mikroorganizmlar kolleksiyalari” negizida Fanlar akademiyasi huzurida “Mikroorganizmlarning Milliy kolleksiyasi”ni tashkil etish;

kimyo-biologiya sohalarida ilm-fanni rivojlantirishda nufuzli ilmiy maktablarni va fan yetakchilarining to‘g‘ridan-to‘g‘ri ishtirokini kengaytirish va mas'uliyatini oshirish maqsadida “O‘zbekiston kimyogarlari”, “O‘zbekiston biologlari”, “O‘zbekiston mikrobiologlari”, O‘zbekiston tuproqshunoslari” kabi yo‘nalishlarda nodavlat-notijorat fan jamiyatlarini tashkil qilish va faoliyatini muntazam yo‘lga qo‘yish to‘g‘risidagi takliflariga rozilik beriladi.

Quyidagilar:

2020-2021 yillarda kimyo va biologiya yo‘nalishida amalga oshirilayotgan ilmiy-tadqiqotlar va innovatsiya ishlari natijadorligini oshirish bo‘yicha kompleks chora-tadbirlar dasturi;

Kimyo va biologiya yo‘nalishida ilmiy-tadqiqotlar va innovatsiya ishlarini rivojlantirishning 2025 yilgacha maqsadli ko‘rsatkichlari tasdiqlanadi.

Quyidagilar Dasturni moliyalashtirish manbalari etib belgilanadi:

Investitsiya dasturi doirasida nazarda tutiladigan mablag‘lar;

Davlat budjeti mablag‘lari;

Innovatsion rivojlanish vazirligi tomonidan o‘tkazilgan tanlovlar natijalari asosida ilmiy-innovatsion loyihalarni amalga oshirish uchun ajratiladigan mablag‘lar;

Qoraqalpog‘iston Respublikasi respublika budjeti, viloyatlar, Toshkent shahar mahalliy budjetlari mablag‘lari;

vazirlik va idoralarning budjetdan tashqari mablag‘lari;

xo‘jalik boshqaruvi organlari va yirik davlat korxonalarining Innovatsion faoliyatni qo‘llab-quvvatlash jamg‘armalari mablag‘lari;

yuridik va jismoniy shaxslarning homiylik xayriyalari;

qonun hujjatlari bilan taqiqlanmagan boshqa manbalar.

Innovatsion rivojlanish vazirligi, Fanlar akademiyasi, “O‘zsanoatqurilishmateriallari” uyushmasi, Davlat aktivlarini boshqarish agentligi, Toshkent shahar hokimligining:

Toshkent shahar, Mirzo Ulug‘bek tumani, Mirzo Ulug‘bek ko‘chasi, 77a-uy manzilida joylashgan Fanlar akademiyasining Umumiy va noorganik kimyo instituti hududidagi foydalanilmasdan bo‘sh turgan yer maydonining 0,5 ga qismini “O‘zsanoatqurilishmateriallari” uyushmasi huzuridagi “O‘zqurilishmaterialLITI” MChJ ilmiy-tadqiqot va injiniring markaziga Milliy laboratoriyaning bino-inshootlarini qurilishi uchun ajratib berish;

laboratoriya va ma'muriy bino-inshootlarni qurish, uni eng ilg‘or, zamonaviy xorijiy ilmiy-tahliliy asbob-uskunalar bilan jihozlash uchun “Qizilqumsement” AJ – 30,5 mlrd. so‘m, “Bekobodsement” AJ – 3,4 mlrd. so‘m hamda “Kvars” AJ – 4,0 mlrd. so‘m, jami 37,9 mlrd. so‘m pul mablag‘larini korxonalarning innovatsion faoliyatni qo‘llab-quvvatlash jamg‘armalari hisobidan 2020 yilning 1 apreliga qadar Markazning ustav jamg‘armasini ko‘paytirish maqsadida o‘tkazib berish;

Markazga istisno tariqasida, tender savdolari o‘tkazmasdan, to‘g‘ridan-to‘g‘ri shartnomalar asosida xorijiy va mahalliy ishlab chiqaruvchilardan laboratoriya asbob-uskunalari xarid qilishga hamda qurilish ishlarini loyiha va smeta-hujjatlari bilan parallel ravishda olib borilishiga ruxsat berish to‘g‘risidagi takliflari ma'qullanadi.

Energetika vazirligi, Fanlar akademiyasi “O‘zbekko‘mir” AJ bilan birgalikda “O‘zbekko‘mir” AJ huzurida yuridik shaxs maqomiga ega bo‘lgan “Ko‘mir va materiallar kimyosi” ilmiy-tajriba laboratoriyasini tashkil etadi. Bunda quyidagilar nazarda tutiladi:

ilmiy-tajriba laboratoriyasini zamonaviy ilmiy-tahliliy asbob-uskunalar bilan jihozlash;

ilmiy-tajriba laboratoriyasidan Fanlar akademiyasining Umumiy va noorganik kimyo instituti olim va mutaxassislari uchun bepul va jamoaviy foydalanishlariga zarur shart-sharoitlar yaratish;

ko‘mir xom-ashyosi va uning chiqindilarini chuqur kimyoviy tahlilini amalga oshirish asosida yangi ilmiy hajmdor texnologiyalarni yaratish va innovatsion mahsulotlar ishlab chiqarishni tashkil etish.

Fanlar akademiyasi Innovatsion rivojlanish vazirligi bilan birgalikda Fanlar akademiyasining Umumiy va noorganik kimyo instituti hamda O‘simlik moddalari kimyosi institutining mavjud ilmiy yo‘nalishlarini to‘liq inventarizatsiyadan o‘tkazish asosida “Ko‘mir kimyosi va texnologiyasi” va “Nozik organik sintez va texnologiyasi” yangi ilmiy yo‘nalishlarining qisqa muddatli ilmiy dasturini ishlab chiqadi va joriy etadi.

Iqtisodiyot va sanoat vazirligi Innovatsion rivojlanish vazirligi bilan birgalikda:

“O‘zkimyosanoat” AJ va “O‘zbekneftgaz” AJ tizimidagi yirik korxonalar huzurida zamonaviy ilmiy-tahliliy asbob-uskunalarga ega bo‘lgan tajriba-ishlab chiqarish laboratoriyalarini tashkil etish bo‘yicha “Yo‘l xaritasi”ni ishlab chiqib, Vazirlar Mahkamasiga tasdiqlash uchun kiritadi;

tajriba tariqasida kimyo sanoati korxonalarida, xususan, “O‘zkimyosanoat” AJ, “Maksam Chirchiq” AJ, “Navoiyazot” AJ huzurida ilmiy faoliyat sub'yektlarining ilmiy-innovatsion ishlanmalarini to‘g‘ridan-to‘g‘ri venchur moliyalashtirish mexanizmi asosida yuqori samarador kimyoviy texnologiyalarni ishlab chiqarishga joriy etishga qaratilgan kichik innovatsion sho‘'ba korxonalarini tashkil etish va kelgusida ushbu mahsulotlarni seriyalab ishlab chiqarishni yo‘lga qo‘yish yuzasidan asoslangan takliflar ishlab chiqadi.

Fanlar akademiyasi huzuridagi Milliy g‘o‘za genofondi kolleksiyasi markazining tuzilmasi tasdiqlanadi.

Milliy markaz direktori Fanlar akademiyasi prezidenti tomonidan lavozimga tayinlanadi va lavozimidan ozod etiladi.

Belgilab qo‘yilishicha:

Milliy markaz davlat ilmiy muassasasi shaklidagi yuridik shaxs bo‘lib, O‘zbekiston Respublikasi davlat gerbi tasviri tushirilgan va o‘z nomi, davlat tilida yozilgan muhrga hamda shaxsiy hisob raqamiga ega bo‘ladi;

Milliy markazning ilmiy va rahbar xodimlarining lavozim maoshlari budjet mablag‘lari hisobiga fundamental, amaliy tadqiqotlar va innovatsion ishlarning davlat ilmiy-texnik dasturlarini amalga oshirishda ishtirok etuvchi ilmiy muassasalarning ilmiy va rahbar xodimlarining bazaviy lavozim maoshiga, boshqa xodimlarning lavozim maoshlari esa – O‘zbekiston Respublikasi Fanlar akademiyasi ilmiy muassasalarining tegishli lavozimlari uchun belgilangan lavozim maoshlariga tenglashtiriladi;

O‘simlikshunoslik ilmiy-tadqiqot instituti, Paxta seleksiyasi, urug‘chiligi va agrotexnologiyasi ilmiy-tadqiqot instituti va O‘zbekiston Milliy universiteti genofond kolleksiyasida saqlanayotgan g‘o‘za urug‘i namunalari nusxasi uzoq muddatga saqlash va raqamlashtirilgan ma'lumotlar bazasiga jamlash uchun Milliy markazga muntazam topshirilib borilishi shartligi qayd etiladi;

Innovatsion rivojlanish vazirligi Fanlar akademiyasi tomonidan mavjud g‘o‘za genofondi namunalarini inventarizatsiyadan o‘tkazish va ularning raqamlashtirilgan ma'lumotlar bazasini yaratish hamda xalqaro ma'lumotlar bazalariga integratsiya qilish bo‘yicha asoslantirilgan loyihalariga ilmiy faoliyatga oid davlat dasturlari doirasida maqsadli grant mablag‘lari ajratadi.

Quyidagilar Milliy markazni moliyalashtirish manbalari etib belgilanadi:

Davlat budjeti mablag‘lari;

Innovatsion rivojlanish vazirligi tomonidan o‘tkazilgan tanlovlar natijalari asosida ilmiy-innovatsion loyihalarni amalga oshirish uchun ajratiladigan mablag‘lar;

xalqaro moliya va boshqa muassasalar hamda xorijiy tashkilotlar grantlari doirasida olingan mablag‘lar;

xo‘jalik faoliyatidan olingan mablag‘lar;

jismoniy va yuridik shaxslarning xayriya mablag‘lari, shuningdek qonun hujjatlarida taqiqlanmagan boshqa manbalar.

Respublikada qishloq xo‘jaligi ekinlarining yangi navlari va geterozis duragaylarini yaratishni tizimli ravishda tashkil etish hamda hududlarning tabiiy tuproq-iqlim sharoitlariga mos qishloq xo‘jaligi ekinlari urug‘chiligi va urug‘shunosligini rivojlantirish maqsadida Toshkent davlat agrar universiteti qoshidagi “G‘o‘za urug‘chiligi markazi” negizida Innovatsion rivojlanish vazirligi huzuridagi Qishloq xo‘jaligi ekinlari seleksiyasi, urug‘chiligi va urug‘shunosligi instituti tashkil etiladi.

Quyidagilar Institut faoliyatining asosiy vazifalari va yo‘nalishlari etib belgilanadi:

qishloq xo‘jaligi ekinlarining seleksiyasi, urug‘chiligi va urug‘shunosligini rivojlantirish hamda yuqori sifatli qishloq xo‘jaligi ekinlari urug‘larini ishlab chiqarish bo‘yicha ilmiy-tadqiqot va innovatsiya ishlarini amalga oshirish;

seleksiya navlari va yuqori geterozisli duragaylarni hamda qishloq xo‘jaligi ekinlarining navdorlik darajasi yuqori bo‘lgan, unib chiqish energiyasi, kasallik va zararkunandalarga chidamlilik va boshqa xususiyatlarga ega navlarini yaratish;

yaratilgan qishloq xo‘jaligi ekinlari yangi navlari va geterozis duragaylarni joriy etish va keng ommalashtirish hamda qishloq xo‘jaligi ekinlari urug‘lari mahalliy bozorida import urug‘lik materiali o‘rniga ularning yuqori sifatli urug‘larini ishlab chiqarish, shu jumladan, raqobatbardoshligini oshirish va narx borasida ustunligini ta'minlash;

dorivor o‘simliklar urug‘shunosligini rivojlantirish;

urug‘lar tayyorlashda urug‘ sifatini xalqaro standartlar darajasiga olib chiqish imkonini beruvchi quritish, tozalash, kalibrlash, zararsizlantirish, qadoqlash, kapsulalash, saqlash hamda stimulyatorlar va zararsizlantiruvchi vositalar bilan ishlov berish kabi zamonaviy usullarni keng ko‘lamda qo‘llanilishini tashkil etishga ko‘maklashish.

Belgilab qo‘yilishicha, Institut huquq va majburiyatlar bo‘yicha Toshkent davlat agrar universiteti qoshidagi “G‘o‘za urug‘chiligi markazi”ning huquqiy vorisi hisoblanadi.

Institutga beg‘araz asosda:

Institut Toshkent viloyati Yuqorichirchiq tumani A.Yassaviy mahalla fuqarolar yig‘ini Sh.Rashidov ko‘chasi, 1-uy manzilida joylashgan Toshkent davlat agrar universiteti qoshidagi “G‘o‘za urug‘chiligi markazi”ning binosi, inshootlarini unga tutash hudud bilan birgalikda operativ boshqaruv huquqi bilan;

Toshkent davlat agrar universiteti qoshidagi “G‘o‘za urug‘chiligi markazi”ning laboratoriya uskunalari, mebel, kompyuter texnikalari va boshqa mulklari beriladi.

Vazirlar Mahkamasi Innovatsion rivojlanish vazirligi, Qishloq xo‘jaligi vazirligi bilan birgalikda Institut va uning filiallarining faoliyatini yo‘lga qo‘yish yuzasidan hukumat qarorini qabul qiladi.

Fanlar akademiyasi Innovatsion rivojlanish vazirligi, Ekologiya va atrof-muhitni muhofazalash davlat qo‘mitasi, O‘rmon xo‘jaligi davlat qo‘mitasi bilan birgalikda quyidagi normativ-huquqiy hujjatlarni belgilab tartibda tasdiqlanishini ta'minlaydi:

Orol dengizining qurigan tubi va qo‘shni qurg‘oqchilik hududlarining biologik xilma-xilligi dinamikasini kuzatish uchun raqamli platformani yaratish dasturi;

respublika fauna va florasining raqamli kadastrini yaratish bo‘yicha “Yo‘l xaritasi”;

Milliy “Qizil kitob”ning yangi tahririni nashr etish bo‘yicha chora-tadbirlar rejasi.

Innovatsion rivojlanish vazirligi:

kimyo va biologiya yo‘nalishining mavjud ilmiy-innovatsion salohiyatidan samarali foydalanish asosida innovatsion texnologiyalar yaratish maqsadida ilmiy-tadqiqot ishlariga davlat buyurtmasi talablariga muvofiq ilmiy loyihalar tanlovini;

ilmiy-tadqiqot loyihalarini xususiy sektor va tarmoq korxonalari bilan teng sheriklikda moliyalashtirish amaliyotini takomillashtirish maqsadida “O‘zkimyosanoat” AJ va “O‘zbekneftgaz” AJning 25 mlrd so‘m va Innovatsion rivojlanish vazirligining 25 mlrd so‘m mablag‘lari hisobiga birgalikda tarmoq korxonalari ehtiyojlari uchun yuqori samarador kimyo texnologiyalari va raqobatbardosh ilmiy hajmdor mahsulotlar yaratishga qaratilgan umumiy hajmi 50 mlrd so‘mlik qo‘shma ilmiy loyihalar tanlovini;

Orolbo‘yi hududining o‘simlik va hayvonot dunyosini rivojlantirish bo‘yicha ekostartap loyihalar tanlovini e'lon qiladi.

Innovatsion rivojlanish vazirligi prezident huzuridagi Orolbo‘yi xalqaro innovatsiya markazi va Qishloq xo‘jaligi vazirligi bilan hamkorlikda:

o‘simliklarning agrotexnik, biologik va kimyoviy ishlovini amalga oshirish uchun respublikaning barcha hududlarida “tuproq klinikalari” xizmatlari tarmoqlarini tashkil qilish;

mahalliy davlat hokimiyati organlari bilan birgalikda tuproqni tahlil qilishning mobil laboratoriyalarini tashkil etish asosida doimiy ravishda qishloq xo‘jaligida tuproqning agrokimyoviy tahlil qilish, ekin yerlari tuproqlari unumdorligi va ozuqa moddalari bilan ta'minlanganlik darajasini doimiy monitoringini amalga oshirish;

orolbo‘yi hududlarida sho‘rlangan yerlarga innovatsiyalarni joriy qilish va sho‘rlangan yerlar degradatsiyasiga qarshi kurashish choralarini ko‘radi.

Shu maqsadda Innovatsion rivojlanish vazirligi ilm-fanga oid davlat dasturlari doirasida maqsadli grant loyihalarni ajratilishini hamda xalqaro ilmiy grantlar va texnik ko‘mak mablag‘larini jalb qilinishini ta'minlaydi.

Investitsiyalar va tashqi savdo vazirligi Innovatsion rivojlanish vazirligi, Fanlar akademiyasi bilan birgalikda:

kimyo yo‘nalishida faoliyat yurituvchi ilmiy-tadqiqot muassasalaridagi mavjud laboratoriyalarni xalqaro standartlarga (GLP va GMP) mos ravishda modernizatsiya qilish uchun xorijiy grant mablag‘larini jalb qilish;

GLP talablariga javob beradigan klinik oldi sinovlarini tashkil etish va uning moliyalashtirish manbalarini aniqlash yuzasidan takliflar ishlab chiqadi va Vazirlar Mahkamasiga kiritadi.

Sog‘liqni saqlash vazirligi Innovatsion rivojlanish vazirligi, Fanlar akademiyasi bilan birgalikda Epidemiologiya, mikrobiologiya va yuqumli kasalliklar institutining “Inson infeksiyalari mikroorganizmi kolleksiyasi”ni doimiy ravishda to‘ldirib va yangilab borilishini, kolleksiya materiallari asosida chuqur ilmiy-tadqiqot ishlarini olib borilishini ta'minlaydi.

Xalq ta'limi vazirligi Oliy va o‘rta maxsus ta'lim vazirligi, Innovatsion rivojlanish vazirligi bilan birgalikda:

a) ta'lim muassasalarida kimyo fanini o‘qitishni takomillashtirish bo‘yicha;

b) 2020 yilning 1 apreliga qadar:

zamonaviy bilim va texnologiyalarni hisobga olgan holda biologiya fanlari bo‘yicha o‘quv dasturlarini, darsliklarni va o‘quv qo‘llanmalarini (shu jumladan o‘rta maktablarda biologiya kursini) ko‘rib chiqish va qayta ishlab chiqish;

universitetlarning o‘quv dasturiga biologiya fanining yangi yo‘nalishlarini, shuningdek biologiya fanining hozirgi tendensiyalarini qamrab oladigan qo‘shimcha ustuvor yo‘nalishlarini kiritish yuzasidan takliflar ishlab chiqib, Vazirlar Mahkamasiga kiritadi.

Oliy va o‘rta maxsus ta'lim vazirligi va Innovatsion rivojlanish vazirligining 2020/2021 o‘quv yilidan boshlab:

a) bakalavriat ta'lim yo‘nalishlari bo‘yicha:

Milliy universitet, Samarqand davlat universiteti va Buxoro davlat universitetida “Biotexnologiya” ta'lim yo‘nalishiga – 50 ta, “Kimyoviy tahlil va ekologik xavfsizlik" ta'lim yo‘nalishiga – 25 ta;

Toshkent kimyo-texnologiyalar institutida “Kimyoviy texnologiya, neft kimyosi va biotexnologiyada energiya va resurslarni tejash jarayonlari” ta'lim yo‘nalishiga – 25 ta;

b) magistratura mutaxassisliklari bo‘yicha:

Milliy universitetda “Mikrobiologiya” mutaxassisligiga – 10 ta, “Kimyoviy tahlil va ekologik xavfsizlik” mutaxassisligiga – 10 ta, “Tabiiy resurslarni qayta ishlash” mutaxassisligiga – 10 ta, “Nozik organik sintez” mutaxassisligiga – 10 ta;

Toshkent kimyo-texnologiyalar institutida “Kimyoviy texnologiya, neft kimyosi va biotexnologiyada energiya va resurslarni tejash jarayonlari” mutaxassisligiga – 8 ta, “Katalizator va adsorbentlar texnologiyasi” mutaxassisligiga – 8 ta, “Nozik organik sintez texnologiyasi” mutaxassisligiga – 10 ta kvota ajratish to‘g‘risidagi takliflariga rozilik beriladi.

Kimyo va biologiya yo‘nalishida ilmiy-tadqiqot ishlarini olib borayotgan iqtidorli yosh olimlarning 2020 yilda qisqa muddatli xorijiy ilmiy stajirovkalarini maqsadli tashkil etish uchun:

a) Innovatsion rivojlanish va novatorlik g‘oyalarini qo‘llab-quvvatlash jamg‘armasi mablag‘lari hisobidan biologiya yo‘nalishida 50 nafar yosh olimlarning;

b) Vazirlar Mahkamasi huzuridagi «El-yurt umidi» jamg‘armasi mablag‘lari hisobidan kimyo yo‘nalishida 50 nafar yosh olimlarning nufuzli xorijiy ilmiy markazlar va universitetlarga qisqa muddatli ilmiy stajirovkalari tashkil etiladi.

Innovatsion rivojlanish vazirligi, Fanlar akademiyasi, Sog‘liqni saqlash vazirligi, Qishloq xo‘jaligi vazirligi, Oliy va o‘rta maxsus ta'limi vazirligi ilm-fan rivojiga, jumladan kimyo va biologiya fanlari rivojiga salmoqli hissa qo‘shgan yosh olimlarning ilmiy tadqiqotlari natijalari uchun Davlat mukofotlari bilan taqdirlashni yo‘lga qo‘yish, shu jumladan Prezident stipendiyasini ta'sis etish yuzasidan Vazirlar Mahkamasiga taklif kiritadi.

Moliya vazirligi kimyo va biologiya yo‘nalishida amalga oshiriladigan «startap» loyihalarni moliyalashtirish uchun 2020 yilda Innovatsion rivojlanish va novatorlik g‘oyalarini qo‘llab-quvvatlash jamg‘armasiga 40 milliard so‘m miqdorida budjet mablag‘larini ajratadi.

Iqtisodiyot va sanoat vazirligi Moliya vazirligi, Investitsiyalar va tashqi savdo vazirligi bilan birgalikda O‘zbekiston Respublikasining Investitsiya dasturidagi parametrlarini tegishli yillarda belgilashda kapital qo‘yilmalar limitlarini, shuningdek, kimyoviy hamda qurilish sanoatini rivojlantirish dasturini amalga oshirish, ilmiy-tadqiqot va sinov laboratoriyalarini tashkil etish hamda jihozlash uchun zarur bo‘lgan markazlashtirilgan investitsiya mablag‘larini ajratilishini ta'minlaydi.

Tashqi ishlar vazirligi, Investitsiyalar va tashqi savdo vazirligi Innovatsion rivojlanish vazirligi, Fanlar akademiyasi, Oliy va o‘rta maxsus ta'lim vazirligi bilan birgalikda bir oy muddatda ilm-fan sohasi va innovatsion faoliyatga xorijiy tashkilotlarning, xalqaro moliya va boshqa institutlarning grantlari va texnik ko‘maklashish mablag‘larini jalb qilish ko‘lamini kengaytirish, ularning soni va jalb qilinadigan mablag‘lari hajmini oshirish yuzasidan taklif ishlab chiqadi va Vazirlar Mahkamasiga kiritadi.