22:15 / 16.03.2020
13869
«Касаллигини яшириб, бошқаларга қасддан юқтирганлар 8 йилгача озодликдан маҳрум этилиши мумкин» – вазир ўринбосари

Ўзбекистонда карантин бўйича амалдаги қонунчилик талабларини бузган, ўзида карантин аломатларини сезса-да, буни яширган, аксинча, кўча-кўйда юриб, коронавирусни бошқаларга ҳам қасддан юқтирган шахслар жиноий жавобгарликка тортилади.

Бу ҳақда адлия вазири ўринбосари Акбар Тошқулов Kun.uz’га берган интервьюсида айтиб ўтди.

«Агар кимда-ким касаллигини била туриб, у бошқаларга ҳам юқишига қасддан йўл қўйса, бу карантин тартибини бузишнинг оғир оқибатга олиб келадиган бир кўриниши ҳисобланади.

Мазкур ҳаракат (ҳаракатсизлик) фуқароларнинг касалланишига ёки ўлимига олиб келса, жавобгарликнинг кўлами каттароқ бўлади.

Жиноят кодексининг тегишли моддаларига тўхталадиган бўлсак, фуқароларнинг ўлими ёки касаллик тарқалишига сабаб бўлган ҳолат – оғирлаштирувчи ҳолат бўлади. Яъни 5 йилдан 8 йилгача озодликдан маҳрум қилишгача бўлган жазога сабаб бўлиши мумкин.

Акбар Тошқулов

Агар фуқаро ҳақиқатан қасддан кимгадир тарқатадиган бўлса, бундай фуқаролар албатта қонун олдида жавоб беради. Агар атайлаб тарқатилгани аниқланадиган бўлса, Жиноят кодексининг бир неча моддалари билан жавобгарликка сабаб бўлади», – деди Акбар Тошқулов.

Вазир ўринбосари, шунингдек, карантин ҳолатида фуқаролар ўртасида ваҳима уйғотган шахслар ҳам жиноий жавобгарликка тортилишини эслатиб ўтди.

«Фуқаролар ёки мансабдор шахслар томонидан карантин тартибларини бузганлик учун қонунларимизда қатъий жавобгарлик чоралари кўзда тутилган. Жумладан, Жиноят кодексининг 2441-моддасига асосан, карантин ҳолатларида фуқаролар ўртасида ваҳимали гапларни тарқатганлик учун ҳам жиноий жавобгарлик белгиланган

Фуқароларимиз ваҳимага берилишлари керак эмас. Ҳозирги кунда ҳукумат ҳамма масалаларда тегишли чораларни кўряпти. Жойларда дезинфекция ишларини амалга оширилмоқда, тиббиёт муассасалари керакли дори ва ҳимоя воситалари билан етарлича таъминланган, вирусга чалинган фуқароларни даволаш, аҳолини тегишли маълумотлар билан таъминлаш бўйича барча чоралар кўриляпти», дейди Акбар Тошқулов.

Аввалроқ Ўзбекистон бош вазири Абдулла Арипов ҳам карантин бўйича амалдаги қонунчилик талабларини бузган фуқаролар жиддий жавобгарликка тортилишидан огоҳлантирганди.

Эслатиб ўтамиз, Ўзбекистонда 15 март куни коронавирусга чалинган илк бемор аниқланди. Ҳозирга қадар коронавирус билан касалланганлар сони 8 нафарга етди.

Мавзу
Коронавирус Ўзбекистонда
15 март куни Ўзбекистонда коронавирусга чалинган илк бемор аниқланди.
Барчаси
Top