20:08 / 17.03.2020
24258
Коронавирус беморлари сони ўсиши тахминан 2 йил давом этиши мумкин – Германия федерал агентлиги

Коронавирус пандемияси тахминан икки йил мобайнида тарқалишда давом этиши мумкин. Бу ҳақда инфекцион касалликларни тадқиқ қилувчи Германия федерал агентлиги раҳбарига таяниб, Reuters хабар тарқатди.

Фото: Odd Andersen/AFP via Getty Images

Роберт Кох номидаги институт президенти Лотар Вилернинг сўзларига кўра, охир-оқибатда дунё аҳолисининг 60-70 фоизи COVID-19 касалланиб, соғайиши ва уларда бу вирусга қарши иммунитет пайдо бўлиши мумкин.

Аммо воқеалар ривожи қанчалик тез рўй беришини тахмин қилиб бўлмайди.

«Ҳозирчалик тахминимизга кўра, бунинг учун икки йил керак бўлади», – деди Вилер сешанба куни матбуот анжуманида.

Унинг қўшимча қилишича, пандемия давомийлиги кўп жиҳатдан унга қарши вакцина қанчалик тез яратилишига боғлиқ.

«Касалликнинг ўлим билан тугаши бўйича якуний кўрсаткич қандай бўлишини ҳозирча айта олмаймиз», – деди Лотар Вилер.

Унинг сўзларига кўра, Германия канцлери Ангела Меркель душанба куни қўшимча қатъий чоралар ҳақида эълон қилмаганида, мамлакатда миллионлаб кишилар коронавирус юқтириб олиши мумкин эди.

Олимнинг қайд этишича, Германияда хавф даражаси юқорилигича қолмоқда. Беморларнинг бешдан бир қисмида касаллик жиддий шаклда кечяпти.

Маълумот учун, Германия коронавирусдан зарарланганлар сони бўйича жаҳонда олтинчи, Европада учинчи ўринда турибди - мамлакатда 8 мингдан ортиқ коронавирус бемори бор, улардан 20 нафари вафот этди, 67 киши соғайди.

Мавзу
Коронавирус
2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.
Барчаси
Top