16:07 / 01.06.2020
7578
Лукашенко Россия ОАВ орқали Беларусга муаммолар тиқиштираётганини айтди

Май ойи бошида Россиянинг Биринчи канали суратга олиш гуруҳи аккредитациядан маҳрум қилинганди. 

Фото: EPA/Vostock-photo

Беларусь президенти Александр Лукашенко давлат хавфсизлик қўмитаси бошлиғи Валерий Вакульчик билан учрашувида мамлакатда бир нечта  пандемия мавжудлигини айтди. Бу ҳақда БелТА агентлиги хабар бермоқда.

"Пандемиялардан бири соғлиқни сақлаш соҳасида. Худога шукр, уни аста-секин бартараф этяпмиз", - деди Лукашенко.

Унинг сўзларига кўра, сайловлар сабабли сиёсий пандемия, жаҳондаги инқироз боис иқтисодий пандемия вужудга келган. 

"Ҳали инфопандемияни айтганим йўқ. Ҳозирда интернет ахлатхонасига ҳар нарсани ташлашяпти ва хориждан, хусусан қардош биродарларимиз ҳам ОАВда муаммоларни тиқиштирмоқда. Аммо биз буларнинг барчасини кўриб турибмиз", - деди Беларусь президенти.

Май ойи бошида Беларусь ТИВ Россиянинг Биринчи канали суратга олиш гуруҳини республикадаги коронавирус билан боғлиқ вазият тўғрисидаги лавҳаси учун аккредитациядан маҳрум қилганди. 

Top