Lukashenko Belarus urushga tayyorlanayotganini aytdi

1 aprel, chorshanba kuni Belarus Qurolli kuchlarining kompleks tekshiruvi yakunlariga bag‘ishlangan yig‘ilishda so‘zlagan Aleksandr Lukashenko, Belarus urushga tayyorlanayotganini ma’lum qildi. Uning so‘zlariga ko‘ra, mamlakatda “tinch davr degan narsa bo‘lishi mumkin emas”. Bu haqda Lukashenko matbuot xizmati saytida e’lon qilingan xabarda aytilgan.

Belarus rahbari mazkur tekshiruvni “har qachongidan ham keng ko‘lamli va qattiqqo‘l” deb atagan. Uning aytishicha, tekshiruv davomida harbiy bo‘linmalar ob-havo sharoiti va kunning qaysi vaqti ekanidan qat’i nazar, jang holatiga imkon qadar yaqin shart-sharoitlarda sinovdan o‘tkazilgan.

“Biz urushga tayyorgarlik ko‘ryapmiz. Qurolli kuchlarni shuning uchun tuzganmiz, shuning uchun ularni saqlayapmiz, xalq ham shunga mablag‘ ajratyapti. Agar biror kim biz bilan qurol nishoni orqali gaplashmoqchi va bizga shu tarzda qaramoqchi bo‘lsa, biz javob qaytaramiz. Biz ana shu holatga tayyorgarlik ko‘ryapmiz”, — deya Lukashenkoning so‘zlarini keltiradi uning matbuot xizmati.

Uning ta’kidlashicha, urush yuz bergan taqdirda Belarus qo‘shinlar sonini 500 ming nafargacha yetkazishi mumkin. Lukashenko so‘zlariga ko‘ra, tekshiruv chog‘ida qo‘yilgan vazifalar darajasi va ularni bajarish sur’ati geosiyosiy vaziyatning jiddiyligi, shuningdek, Belarus chegaralariga yaqin hududlarda yuz berayotgan voqealar va tahdidlar bilan bog‘liq bo‘lgan. Bundan oldin u Belarusga hujum “uchinchi jahon urushiga kirish qismi” bo‘lishidan ogohlantirgan edi.

Aleksandr Lukashenko va KXDR oliy rahbari Kim Chen In 26 mart kuni Pxenyanda ikki davlat o‘rtasida do‘stlik va hamkorlik to‘g‘risida shartnoma imzoladi. Bu haqda Shimoliy Koreya davlat axborot agentligi — KCNA xabar berdi.

Lukashenko matbuot xizmati esa ushbu “fundamental hujjat” imzolanganidan keyin Belarus va Shimoliy Koreya o‘rtasidagi munosabatlar “yangi bosqichga ko‘tarilayotganini” bildirdi.

Matbuot xizmati bayonotiga ko‘ra, KXDR rahbari Belarusga “hamjihatlik va to‘liq qo‘llab-quvvatlov” bildirgan hamda G‘arbning Minskka nisbatan “noqonuniy bosimi”ga qarshi chiqqan. Shuningdek, Lukashenko Belarus va KXDR hukumatlari xalqaro masalalar bo‘yicha “bir xil qarash”ga ega ekanini aytgan.

Lukashenko 25 mart kuni Shimoliy Koreyaga birinchi rasmiy tashrif bilan borgan edi. KXDR va Belarus Rossiyaning Ukrainaga qarshi urushida Moskvaga katta yordam ko‘rsatib kelmoqda. Pxenyan Rossiyaga o‘q-dori va shimoliy koreyalik harbiylarni yubormoqda. Minsk esa 2022 yil fevral oyida Rossiyaga Belarus hududidan Ukrainaga keng ko‘lamli hujum qilish uchun platsdarm sifatida foydalanish imkonini bergan va shu yerda Rossiyaning taktik yadroviy qurollarini joylashtirishga rozilik bildirgan.