JSST koronavirusning Yevropadan kelib chiqqani to‘g‘risidagi taxminga izoh berdi

Pekindagi virus shtammi darhaqiqat Yevropadagi virus shtammiga o‘xshaydi, dedi JSSTning favqulodda kasalliklar bo‘linmasi texnik guruhi rahbari Mariya Van Kerkxove.

"Pekin virusning bir nechta ketma-ketliklarini taqdim etdi. Tushunishimizcha, virus Yevropa shtammi bilan bog‘liq", - dedi u.

JSSTning sog‘liqni saqlash sohasidagi favqulodda vaziyatlar bo‘yicha dasturi direktori Maykl Rayan bu virus dastlab Yevropadan kelib chiqqanini anglatmasligini ta'kidladi.

"Virusning Yevropa shtammi haqida gapirganda hushyor bo‘lish kerak. Shtammlar butun dunyo bo‘ylab aylanib yuradi. Masalan, Nyu-Yorkka borsangiz, u yerdagi har qanday virus Yevropada kelib chiqqan bo‘lishi mumkin. Hattoki Yaponiyada ham Yevropadan olib kelingan holatlar mavjud. Shunday ekan, men virus Yevropada paydo bo‘lgan deb o‘ylamayman. Virus Pekinga tashqaridan kelgan bo‘lishi mumkin", - dedi Rayan.

Uning so‘zlariga ko‘ra, bu yerda gap virusning hayvondan odamga o‘tishi emas, odamdan odamga o‘tishi haqida bormoqda.