Nyu-Yorkda pandemiya boshlanganidan beri birinchi marta sutka davomida koronavirusdan o‘lim holati qayd etilmadi

Nyu-York sog‘liqni saqlash va ruhiy gigiyena departamenti ma'lumotlariga ko‘ra, shaharda bugungi kungacha koronavirusdan jami 18670 kishi vafot etgan.

Foto: Angus Mordant/Bloomberg

AQShda koronavirus tarqalishi o‘chog‘iga aylangan Nyu-Yorkda pandemiya boshlanganidan beri birinchi marta sutka davomida koronavirusdan o‘lim holati qayd etilmadi. Bu haqda Bloomberg xabar bermoqda.

Shaharda koronavirusdan o‘lim holati ilk marta 11 martda qayd etilgandi. 7 aprel kuni kasallikdan bir sutkada 597 kishi vafot etdi. Bular bemorning koronavirus yuqtirgani laboratoriyada tasdiqlangan holatlardir.

Nyu-York sog‘liqni saqlash va ruhiy gigiyena departamenti ma'lumotlariga ko‘ra, shaharda bugungi kungacha koronavirusdan jami 18670 kishi vafot etgan (yana 4613 kishi COVID-19dan o‘lgan bo‘lishi mumkin, ammo bu testlar orqali tasdiqlanmagan).

AQSh koronavirus yuqtirish holatlari qayd etilishi bo‘yicha dunyoda birinchi o‘rinda turibdi. Jons Hopkins universitetining ma'lumot berishicha, 3,3 mln amerikalik kasallikka chalingan.