«Tez yordam operatorlariga sifatli xizmat ko‘rsatilgan har bir qo‘ng‘iroq uchun 1500-2000 so‘m bonus beriladi» - Toshkent shahar prokurori

Xalqaro press-klubning 20 iyuldagi sessiyasida chiqish qilgan Toshkent shahar prokurori Bahriddin Valiyev shahardagi tez tibbiy yordamga oid yangiliklarni sanab o‘tdi. Bu haqda Kun.uz muxbiri xabar beradi.

Valiyevning so‘zlariga ko‘ra, so‘nggi kunlarda Toshkent shahrida mavjud 170ta tez yordam mashinasiga qo‘shimcha ravishda 50ta Damas, 28ta Isuzu mashinaci olib kelingan.

«Tez tibbiy yordam operatorlari shtati ko‘paytirildi, volontyorlar jalb etildi. Ta'tilda bo‘lib turgan tibbiyot xodimlari, tibbiyot kollejlari talabalari va o‘qituvchilari ko‘ngilli asosda ishga jalb qilinib, ularga oylik to‘lov belgilandi.

Shahar hokimi tomonidan yana bir yaxshi ish qilindi: har bitta qo‘ng‘iroqqa bonus e'lon qildi. Sifatli javob berilgan har bitta qo‘ng‘iroq uchun 1500 so‘m, murojaatchi suhbat davomida minnatdorlik bildirgan taqdirda yana qo‘shimcha 500 so‘m qo‘shib beriladigan bo‘ldi.

Tez yordamning bitta ekipajida 3 kishi ishlaydi: haydovchi, hamshir va vrach. Ularga maxsus varaqa beriladi. Agar tez yordam chaqirgan fuqaro o‘sha varaqaga ko‘rsatilgan xizmatdan minnatdorligini, xodimlar yaxshi muolaja va muomala qilganini yozib bersa, ekipajga 100 ming so‘m bonus beriladi», – dedi Toshkent shahar prokurori Bahriddin Valiyev.

Eslatib o‘tamiz, poytaxt tez yordam tizimida rag‘batlantirish qo‘llana boshlashi haqida avvalroq shahar hokimligi matbuot kotibi Furqat Mahmudxo‘jayev ma'lum qilgan edi.