Qishloq xo‘jaligi mashinasozligi korxonalari ishonchli boshqaruvga beriladi

Vazirlar Mahkamasi 8.07.2020 yildagi “Qishloq xo‘jaligi mashinasozligi tashkilotlari faoliyatining samaradorligini oshirishga oid chora-tadbirlar to‘g‘risida”gi 430-son qarorni qabul qildi.

Norma’ning yozishicha, hujjat bilan qishloq xo‘jaligi mashinasozligini yanada rivojlantirishning quyidagi asosiy yo‘nalishlari belgilandi:

ishlab chiqarilayotgan mahsulot turlarini qayta ko‘rib chiqish va unifikatsiya qilish, ularning sifatini yaxshilash, tannarxini pasaytirish va qishloq xo‘jaligi mashinasozligi tashkilotlarining rentabelligini oshirish;

2030 yilgacha O‘zbekiston Respublikasi qishloq xo‘jaligini rivojlantirish strategiyasiga muvofiq zamonaviy moliyalashtirish tizimi, marketing siyosati, sotishdan keyingi va servis xizmati ko‘rsatish siyosati nazarda tutilgan qishloq xo‘jaligi mashinasozligini rivojlantirishning yangi strategiyasini zarur bo‘lganda, xorijiy konsalting kompaniyasini jalb qilgan holda ishlab chiqish va amalga oshirish;

investitsiya dasturlari, mahalliylashtirish va import o‘rnini bosish dasturlarini tanqidiy qayta ko‘rib chiqish va Vazirlar Mahkamasiga takliflar kiritish;

ishlab chiqarilayotgan mahsulotga ichki talabni qanoatlantirish, sanoatning elektrotexnika, avtomobil va boshqa tarmoqlari, shuningdek, tadbirkorlik sub'yektlari bilan tarmoqlararo kooperatsiyasini rivojlantirish chora-tadbirlarini amalga oshirish;

korrupsiyaga qarshi «komplayens-nazorat» tizimini joriy qilish, sohaga investorlarni jalb etish choralarini ko‘rish;

hududlarda kompleks servis xizmatlari ko‘rsatish bo‘yicha dilerlik-servis tizimini tashkil qilish, davlat-xususiy sheriklik asosida tadbirkorlik sub'yektlarini keng jalb qilgan holda, qishloq xo‘jaligi texnikasiga buyurtmalarni shakllantirish;

sohaga oid bo‘lmagan va norentabel aktivlarni xatlovdan o‘tkazish, ularni keyinchalik xususiylashtirish uchun Davlat aktivlarini boshqarish agentligiga belgilangan tartibda berish.
 
Davlat aktivlarini boshqarish agentligiga tasdiqlangan ro‘yxatga muvofiq xo‘jalik jamiyatlari ustav kapitalidagi «O‘zagrotexsanoatxolding» AJning ulushlarini (aksiyalarini) «O‘zavtosanoat» AJga ishonchli boshqaruvga berish yuklatildi, xususan:

«Toshkent qishloq xo‘jaligi texnikasi zavodi» AJning 100 foiz;

«Agregat zavodi» AJning 99,3 foiz;

«Texnolog» AJning 98,8 foiz;

«Chirchiq qishloq xo‘jaligi texnikasi zavodi» AJning 89,6 foiz;

«Qishloq xo‘jaligi mashinasozligi konstruktorlik-texnologik markazi» MChJning 99,6 foiz;

«Agrosanoatmashinvest» MChJning 100 foiz ulushlari (aksiyalari).
 
Hujjat bilan «Urganchozuqamash» AJning (26 foiz) va «Agrotex-lit» MChJning (2,7 foiz) ustav kapitalidagi davlat ulushlarini savdoga qo‘yish, «Agrotexmash-DD» MChJ va «Agromash sanoat invest» MChJ faoliyatini tugatish nazarda tutilgan.
 
Qarorda «O‘zavtosanoat» AJning yangilangan tashkiliy tuzilmasi bir oy muddatda tasdiqlanishi, «O‘zavtosanoat» AJning o‘z nomlarida «UzAuto» brendidan foydalanish huquqiga ega bo‘ladigan sohaga ixtisoslashtirilgan alohida guruhlarga ajratilgan va 100 foiz ulushli ishtiroki bilan mas'uliyati cheklangan jamiyatlar shaklidagi boshqaruvchi kompaniyalar tashkil etilishi yozilgan.
 
Ishonchli boshqaruvchilarning vakolatlari, vazifalari va ularning xizmatlariga haq to‘lash tartibi belgilangan.
 
Ishonchli boshqaruvchiga manfaatdor vazirliklar, idoralar va ilgari jalb qilingan konsalting kompaniyalari bilan birgalikda qishloq xo‘jaligi mashinasozligi tarmog‘ini rivojlantirish bo‘yicha quyidagilarni nazarda tutuvchi dastur ishlab chiqilishini bir oy muddatda yakunlash topshirildi:

ishlab chiqarilayotgan texnika turlarini optimallashtirish, respublikada «yagona platforma» asosida ishlab chiqarilayotgan qishloq xo‘jaligi texnikasi budjet modellarining milliy brendini yaratish;

bog‘dorchilik, meva-sabzavotchilik, chorvachilik uchun texnika turlarini, qishloq xo‘jaligi uchun kichik mexanizatsiya vositalarini ishlab chiqarishni kengaytirish hamda umumiy ishlab chiqarish hajmini ko‘paytirish;

korporativ boshqaruvning zamonaviy usullarini, «ERP» avtomatlashtirilgan hisobga olish tizimini, marketing tadqiqotlari natijalaridan kelib chiqqan holda ishlab chiqarish hamda sifatni boshqarishning zamonaviy tizimlarini joriy etish va boshqalar.
 
Iqtisodiy taraqqiyot va kambag‘allikni qisqartirish vazirligi, Moliya vazirligi hamda Davlat aktivlarini boshqarish agentligining 2019 yil yakunlariga ko‘ra «O‘zavtosanoat» AJ aksiyalari bo‘yicha dividendlarni sof foydaning 30 foizi miqdorida hisoblash va dividendlarni to‘lash muddatini penya hamda foizlar hisoblanmasdan 2020 yil 31 dekabrgacha belgilash taklifi tasdiqlandi.
 
Hujjat 09.07.2020 yildan kuchga kirdi.