Daily Mail Жорж Флойдни қўлга олиш жараёни акс этган янги видеони эълон қилди
Видеода Флойд полициячиларни клаустрофобияси борлиги ҳақида огоҳлантиргани, улардан ўзини ўлдирмасликларини сўрагани, қайта-қайта нафас ололмаётганини айтгани кўринади.
Brian Peterson / Star Tribune via AP file
46 ёшли афроамерикалик Жорж Флойд 25 май куни Миннеаполис шаҳрида шафқатсизлик қурбони бўлган эди – полициячи қўлга олиш чоғида бўйнини тиззаси билан босиб бўғиб уни ўлдириб қўйган. Флойд полициячиларни клаустрофобияси (ёпиқ жойдан қўрқиш) борлиги ҳақида огоҳлантирган. Улардан ўзини ўлдирмасликларини сўраган ва полициячи тиззаси билан бўйнидан босиб турган пайтда бир неча мартда нафас ололмаётганини айтган. Ҳодиса деталларигача акс этган видео Британиянинг Daily Mail нашри томонидан душанба куни эълон қилинди.
Қайд этилишича, Daily Mail томонидан жамоатчиликка намойиш этилган лавҳалар Жорж Флойдни қўлга олишда иштирок этган полициячилардан бирининг боди-камераси томонидан ёзиб олинган видеони бир қисми холос. Мазкур видеоёзувлар аллақачон судга тақдим этилган, бироқ ҳозиргача оммавий ахборот воситалари фақат ҳодиса иштирокчиларининг суҳбатларинигина қўлга кирита олишган эди.
Бундан ташқари, 25 майдаги ҳодисадан сўнг ижтимоий тармоқларда гувоҳлар томонидан олинган марҳум ҳаётининг сўнгги дақиқалари акс этган видеолар тарқаб кетганди. Бироқ ушбу видеотасвирларда воқеанинг сўнгги қисми –полициячи Дерек Шовин ерда ётган шахсни тиззаси орқали бўйнидан бўғиш услубини қўллаётган, Жорж эса нафас ололмаётганини айтаётган жараён акс этган.
Daily Mail томонидан эълон қилинган иккита видеолавҳанинг умумий давомийлиги тахминан 26 дақиқани ташкил этади. Ушбу кадрларда полициячилардан бири – Томас Лейн Флойдга тўппонча ўқталиб, машинадан чиқишни талаб қилаётгани кўринади.
Кейинроқ Флойд уни полиция машинасига ўтирғизмоқчи бўлишганда қаршилик кўрсатишга уринади ва ўзининг ҳаракатларини клаустрофобияси борлиги билан изоҳлайди. Иккинчи видеоёзувнинг сўнггида Дерек Шовин Флойд унга ўлаётгани айтганига қарамасдан тиззаси билан унинг бўйнидан бир неча дақиқа давомида босиб тургани кўринади.
Мавзу
Миннеаполисдаги намойишлар
Барчаси
25 май куни Миннеаполисда полиция томонидан қўлга олинган 46 ёшли афроамерикалик Жорж Флойд вафот этгач АҚШда оммавий намойишлар бошланиб кетди.
Мавзуга оид
