Indoneziya koronavirusga qarshi o‘z vaksinasi klinik sinovlarini boshladi

Indoneziya 2021 yil o‘rtalariga kelib koronavirusga qarshi vaksinaning ommaviy ravishda paydo bo‘lishiga umid qilmoqda. Indoneziyalik olimlarning xitoylik hamkasblari bilan birga ishlab chiqqan vaksinasi klinik sinovlari boshlanishi munosabati bilan Indoneziya prezidenti Joko Vidodo shunday bayonot bilan chiqqan.

“Biz o‘z vaksinamiz ustida 3 oydan beri ish olib bormoqdamiz”, deb keltirgan Vidodo so‘zlarini The Jakarta Post nashri. Prezident vaksina imkoni boricha tezroq paydo bo‘lishiga umid bildirgan. Vaksinaning ilk inʼeksiyalarini 20 ko‘ngilli olgan. Sinovlarda hammasi bo‘lib 1,6 mingga yaqin ko‘ngilli, jumladan G‘arbiy Yava provinsiyasi gubernatori Rizvon Komil ishtirok etadi.

Eng optimistik prognozlarga ko‘ra, vaksinaning sinovlari 2021 yilning yanvarigacha davom etadi. Indoneziya o‘z vaksinasidan yiliga 250 mln doza ishlab chiqarishni rejalashtirgan.