Lukashenko yangi prezidentlik muddatiga nomzodini qo‘ymaslikka va'da bergani ma'lum qilindi

Voskresenskiyning ta'kidlashicha, Lukashenko yangi muddatga nomzodini qo‘ymaslikka hibsda ushlab turilgan muxolifat vakillari bilan 10 oktyabrda o‘tgan uchrashuvida va'da bergan.

“U “davra suhbati” ishtirokchilariga prezidentlikdan to‘yganini aytdi va bu uning oxirgi muddati ekaniga va'da berdi”, deb ma'lum qilgan prezidentning muxolifatchilar bilan uchrashuviga izoh berib Voskresenskiy. Uning o‘zi ham hisbga olinganlar orasida bo‘lgan va o‘sha uchrashuvda ishtirok etgan. Uchrashuvdan ko‘p o‘tmay u ozod etilgan.

Muxolifatchining ta'kidlashicha, u Lukashenkoning so‘zlariga ishonadi. Uning aytishicha, Lukashenko yangi konstitutsiyada prezidentlik muddatlarini cheklashga ham tayyor. 

“Sizga “davra suhbatidan yana bir sensatsiyani ma'lum qilaman. Lukashenko “Sizga so‘z beraman, shaxsan o‘zim konstitutsiyada prezidentlik muddatlari ikkita muddat bilan cheklanishi uchun tuzatmalar kiritish taklifi bilan chiqaman”, deb aytdi”, deb ma'lum qilgan Voskresenskiy.

Uning fikricha, Lukashenko konstitutsiyaga bir qator boshqa takliflarni, jumladan parlament roli kuchaytirilishini qo‘llab-quvvatlashga tayyor.

“Avval u bunga tayyor emas edi, chunki bunga jamiyatdan talab bo‘lmagan. Biroq endi jamiyat bunday o‘zgarishlar uchun yetildi”, deb o‘z so‘zlarini yakunlagan muxolifatchi.

Aleksandr Lukashenko 9 avgustda o‘tgan prezidentlik saylovlari natijalariga ko‘ra 6-muddatga qayta saylangandi. U 23 sentyabrdan o‘z lavozimini bajarishga kirishgan.