10:02 / 19.12.2020
5811
“Одамларимиз орасида ношукрлик қилаётганлар ҳам бор” — Сирдарё вилояти ҳокими

Сардоба сув омбори  ҳалокати юз берган ҳудудларда яшовчи 300 га яқин оила бошқа вилоятларда, бошқа туманларда яшайдиган қизларини уй олиш мақсадида турмушидан чиқариб, уйига олиб келган. Бу ҳақда Сирдарё вилояти ҳокими Ғофуржон Мирзаев халқ депутатлари вилоят Кенгашининг 15-сессиясида маълум қилди.

Унинг сўзларига кўра, 1800 дан зиёд бетон панелли уйлар ҳамда 3 та 2640 хонадонли шаҳарчани республика ва ҳомийлик маблағлари ҳисобига 150 кун ичида қуриб битказиб, эгаларига топширишга эришилди.

Уйларни топшириш вақтида ишчи гуруҳ томонидан ёши улуғ, кексалар, уйида ногиронлиги бор фарзандини боқаётган оилалар, кўп болали оилаларга алоҳида эътибор қаратилди. Уларга асосан биринчи қаватдан жой берилди. Ҳаммаси қуръа асосида ўтказилди.

Ҳозирга қадар 2140 оила уйга кўчиб кирди. Яна 500 та уй бор. Битта хонадонда 3 та оилалилар – 200 га яқин, 2 та оилалилар – 110 га яқин ҳамда ГАСН ташкилоти томонидан “яшаб бўлмайди” деган хулоса берилган 100 дан ортиқ оилалар бор.

“Булар билан бир қаторда муаммоларимиз ҳам мавжуд. Одамларимиз орасида ношукрлик қилаётганлар ҳам бор. Менга бу гапларни айтиш оғир, лекин очиқ айтишим керак. Шу ҳудудларда яшовчи 300 га яқин оила бошқа вилоятларда, бошқа туманларда яшайдиган қизларини уй олиш мақсадида турмушидан чиқариб, уйига олиб келган. Ўзи янги хонадонлардан олган. Келиб яна айтяпти, мана қизим 4 та фарзанди билан келиб қолди. Нега унга уй бермайсизлар деяпти. Улардан ажрим қоғози, ажрашганлигини исботи сўралганда тақдим эта олишмади.

Иккинчиси, бир хонадон кадастрида бир нечта оила бор. Аслида фарзандлари оила қуриб ёки алоҳида кўчиб чиқиб Гулистонда, Янгиерда, Ховосда яшайди. Кадастр ҳужжатидан чиқарилмаган. Энди у ҳам даъво қиляпти, ўғлимга ёки қизимга ҳам уй берасан деб.

Учинчиси, бирга яшаган ака-укаларга ҳам 2 та алоҳида уй берилган. Мукаммал таъмирланган 3 хонали уй. Бунда 2 та уйга эгалик ҳуқуқини оляпти-да, эртасига биттасини 100 млн сўмга сотувга қўйяпти”, - деди Сирдарё вилояти ҳокими.

Top