Rossiyada koronavirusga qarshi emlanganlarga sertifikat berish boshlandi

Rossiyada 2021 yil 1 yanvardan boshlab davlat xizmatlari portali orqali koronavirus infeksiyasiga qarshi emlanganlik to‘g‘risidagi sertifikatni olish mumkin. Bu haqda mamlakat sog‘liqni saqlash vaziri Mixail Murashko ma'lum qildi.

«Vaksinatsiya qilinganlar davlat xizmatlari saytidagi shaxsiy kabinetida koronavirusga qarshi emlanganligi to‘g‘risidagi sertifikatni olishi mumkin», — dedi Murashko.

Uning ta'kidlashicha, elektron sertifikat avtomatik rejimda taqdim etiladi, koronavirusga qarshi emlangan shaxslar to‘g‘risidagi ma'lumotlar registrga kiritilgan.

Murashkoning so‘zlariga ko‘ra, Rossiyada 800 ming kishi koronavirusga qarshi emlandi.

Gamaleya markazi tomonidan ishlab chiqilgan «Sputnik V» vaksinasi 11 avgustda ro‘yxatga olingandi. 

 Dekabr boshlarida Rossiya prezidenti Vladimir Putin koronavirus infeksiyasiga qarshi ommaviy emlashni boshlash to‘g‘risida topshiriq berdi. 15 dekabr kuni bosh vazir Mixail Mishustin Rossiyada ommaviy emlash boshlanganligini e'lon qildi.

Moliya vaziri Anton Siluanovning so‘zlariga ko‘ra, vaksinatsiya 75-100 mlrd rublga tushadi.