20:59 / 23.01.2021
4454
Трампнинг импичментини кўриб чиқиш муддати кечиктирилди

Сенатда икки партия ўртасида бу борада келишувга эришилди. Демократлар душанба куни айблов моддаларини Конгресс юқори палатасига топширишлари лозим.

Фото: Reuters

Доналд Трампга нисбатан иккинчи импичмент иши бўйича тингловлар кечроқ – собиқ президентнинг адвокатлари иш билан танишиб чиқиши учун энг эртаси билан 8-9 февралда бошланади. Бу ҳақда BBC хабар бермоқда.

Сенатда икки партия ўртасида бу борада келишувга эришилди. Демократлар душанба куни 19.00дан кечиктирмасдан айблов моддаларини Конгресс юқори палатасига топширишлари лозим.

Демократлар Трампни исёнга чақириш ортидан Капитолийга ҳужум қилиниши ва беш кишининг ўлимида айблашмоқда.

Импичмент эълон қилиш учун 232 конгрессмен овоз берди, 197 нафари қарши чиқди.

Трамп вакиллар палатаси иккинчи марта импичмент эълон қилган АҚШ тарихидаги биринчи президент бўлди.

Биринчи импичмент 2019 йил декабрида эълон қилинганди. Ўшанда конгрессменлар Трампни ҳокимиятни суиистеъмол қилиш ва конгресс ўтказган терговга тўсқинлик қилишда айблашган. Бироқ сенат импичментга қарши овоз берган.

Импичмент эълон қилинишига Трампнинг Украина президенти Владимир Зеленский билан телефон суҳбати асос бўлган. Суҳбат давомида АҚШ президенти украиналик ҳамкасбидан Жо Байден ва унинг ўғли Хантерга қарши тергов бошлашни талаб қилган. ОАВ маълумотларига кўра, Зеленский рад жавобини берадиган бўлса, Трамп Киевга ҳарбий ёрдамни тўхтатиш билан пўписа қилган.

Top