​«Masala hal» – Toshkent metropoliteni poyezdning yopilmagan eshiklari uchun uzr so‘radi

«O‘zbekiston temir yo‘llari» AJning Telegram kanalida holat yuzasidan rus tilida izoh qoldirildi.

«Mazkur vaziyat kuni kecha soat 18:40da «Pushkin» va «Buyuk Ipak Yo‘li» bekatlari oralig‘ida ro‘y bergan. «Buyuk Ipak Yo‘li» bekatiga yetib kelgandan keyin bu nosozlik bartaraf etilgan va sostav shtat rejimida ishlashda davom etgan.

Muhtaram yo‘lovchilar! Harakatlanuvchi sostavning eshiklari avtomatik yopilish tizimiga ega. Metropolitenning har bir harakatdagi sostavida eshiklarning lokomotiv signalizatsiyasi bor va u ochiq eshiklar bilan harakatlanishning oldini oladi. Lekin eshiklar yopilishiga sun'iy to‘siq qo‘yilsa yoki yopish mexanizmiga begona jismlar tushib qolsa, avtomatik yopish tizimi ishlamay qoladi. Ya'ni bunday holatlarda eshiklarning pnevmatik magistrali o‘chadi.

Yo‘lovchilardan vagonlarda favqulodda holatlar yuz berganda har bir vagonda ikkitadan bo‘lgan «yo‘lovchi-mashinist» aloqa tizimi orqali xabar berishni so‘raymiz. Shuningdek, eshiklarga suyanmaslik, ularning harakatiga to‘sqinlik qilmaslik, avtoyopilish jarayonida ularni tutib turmaslik so‘raladi. Yo‘lovchilar vagonga kirib olish yoki kimgadir kirishga yordam berish maqsadida ko‘p hollarda avtomatik kamarlarni tutib qolishadi. Buning natijasida sostav belgilangan muddatdan ko‘proq ushlanib qoladi.

«Toshkent metropoliteni» DUK rahbariyati ro‘y bergan holat bo‘yicha uzr so‘raydi va ayni paytda bu borada xizmat tekshiruvi o‘tkazilayotgani, vagon ichi va bekatlardagi videokuzatuv kameralari yozuvlari o‘rganilayotganini ma'lum qiladi», – deyiladi rasmiy izohda.

Metropolitenning rasmiy izohida barcha aybni yo‘lovchilarga yuklash ishtiyoqi sezilib turadi. Ammo nega deyarli 45 yillik faoliyat davomida bunday holatlar ustma-ust kuzatilmaganiga oid biror so‘z yo‘q?

Vaziyatni osongina uzr so‘rash bilan xaspo‘shlash, qator holatlarning asl sabablari bo‘yicha tushunarli axborot bermaslik, eng muhimi favqulodda holatlarning oldini olish yuzasidan aniq bir rejaga ega emaslik bugungi kun metropoliten tizimiga berilgan baho bo‘la oladi.

Eslatib o‘tamiz, bu so‘nggi bir oy ichida ro‘y bergan to‘rtinchi noxush holatdir.

18 mart kuni metroning yer usti Sergeli yo‘nalishi boshlanish joyida ikki poyezd to‘qnashib ketgan edi. To‘xtab qolgan tarkibga ortidan kelgan boshqa bir tarkib kelib urilgan.

7 aprel kuni esa O‘zbekiston yo‘lining «G‘afur G‘ulom» bekatida poyezd texnik sabablarga ko‘ra to‘xtab qoldi, natijada yo‘lovchilar boshqa tarkibga ko‘chirildi, yurmay qolgan poyezdni boshqa bir poyezd shatakka olishiga to‘g‘ri keldi.

8 aprel kuni esa qurilganiga bir yil bo‘lmagan Sergeli yo‘nalishida avariyaviy holat ro‘y berdi: kontakt relsining kronshteynlari chiqib ketdi, natijada vagonlardagi yo‘lovchilar yer usti metrosi bo‘ylab piyoda ketishlariga to‘g‘ri keldi. Yo‘nalishdagi qatnov 6 soatga to‘xtab qoldi.

Abror Zohidov