21:02 / 24.04.2021
10218
Лукашенко ташкилотчилар уни ўлдириш учун 11 млн доллар ажратишганини айтди

Лукашенконинг сўзларига кўра, фитначиларда унга суиқасд қилишнинг бир нечта сценарийлари мавжуд бўлиб, улардан бири Беларусь президентини 9 май куни ўтказиладиган парад чоғида ўлдириш бўлган.

Фото: president.gov.by

Беларусь президенти Александр Лукашенко мамлакатда давлат тўнтариши уюштириш ва унга суиқасд қилишга уринганларнинг режалари ҳақида маълум қилди. Бу ҳақда БелТА хабар бермоқда.

Лукашенконинг сўзларига кўра, фитначиларда унга суиқасд қилишнинг бир нечта сценарийлари мавжуд бўлиб, улардан бири Беларусь президентини 9 май куни ўтказиладиган парад чоғида ўлдириш бўлган. Аммо буни амалга ошириш қийин бўлгани учун улар бу режадан воз кечган, деди Лукашенко.

 Унинг сўзларига кўра, иккинчи сценарий президент кортежига ҳужум қилиш бўлган. Фитначилар бунинг учун гўёки мамлакат ҳудудига гранатомётлар олиб кирган. Улар бу режани амалга оширолмасди, чунки кортеждаги автомобиллар катта тезликда ҳаракатланади ва уларни нишонга олиш эҳтимоли жуда кам, деди Беларусь раҳбари.

Учинчи сценарий давлат раҳбарининг шаҳар ташқарисидаги қароргоҳига қуролли ҳужум уюштиришни кўзда тутган. Лукашенконинг айтишича, уни ва қароргоҳини йўқ қилиш учун «10 млн доллар, снайперга эса 1 млн доллар ажратилган».

 «Москвадаги операция қўққисдан ўтказилди деб ўйлаяпсизларми? Уларни кузатаётгандик, улар Минскка келиши ва операция ўтказиши керак эди. Уларнинг ҳар бир қадамини назорат қилиб тургандик», — деди у. 

Унинг сўзларига кўра, фитначилар орасида махсус хизмат ходими ҳам бўлган, у сотқин генерал ролини ўйнаган.

«У бизнинг агентимиз эди. Йигитга раҳмат, бизга катта ёрдам берди, қўрқмади. У орқали армияни кўтаришни хоҳлашган», — деди Лукашенко.

Эслатиб ўтамиз, 18 апрел куни Россия Федерал хавфсизлик хизмати (ФСБ) ва Беларусь давлат хавфсизлик қўмитаси (КГБ) Беларусда ҳарбий давлат тўнтаришига уриниш ва мамлакат президенти Александр Лукашенконинг ҳаётига суиқасднинг олди олингани ҳақида маълум қилганди.

Top