21:20 / 08.05.2021
12897
Путин Россиянинг Тожикистондаги ҳарбий базаси мустаҳкамланишини айтди

Тожикистон президенти мамлакат Афғонистон билан энг узун чегаралардан бирига эгалигини қайд этди.

Россия президенти Владимир Путин Москвада Тожикистон президенти Имомали Раҳмон билан учрашуви чоғида Афғонистондаги вазият кескинлашгани сабабли Россия Душанбени қўллаб-қувватлашини билдирди.

«Ҳозирда минтақада хавфсизлик масаласи биринчи рақамли масала. АҚШнинг ўз қўшинларини олиб чиқиб кетиши тўғрисидаги баёноти эълон қилиниши билан — амалда улар қўшинларининг ярмидан кўпини олиб чиқиб кетишди — Афғонистонда вазият кескинлашди», — деди Раҳмон.

Тожикистон президенти мамлакат Афғонистон билан энг узун чегаралардан бирига эгалигини қайд этди.

«Биз сизларни қўллаб-қувватлаш учун ўз томонимиздан барча ишларни амалга оширяпмиз – Тожикистонда Россия қуролли кучларининг 201-ҳарбий базаси фаолият олиб бормоқда. Биз уни, Тожикистон қуролли кучларини мустаҳкамлаш устида ишлаяпмиз», — деди Владимир Путин.

Имомали Раҳмон Владимир Путиннинг таклифига биноан Москвага амалий ташриф билан келган, у 9 май байрами муносабати билан ўтказиладиган тантаналарда иштирок этади.

Top