18:35 / 24.05.2021
3540
Туркия Россияга курорт шаҳарларга парвозларни тиклашни таклиф қилди

Россия ҳукумати 15 апрелдан 1 июнгача Туркия билан авиақатновларни чеклаганди. 

Фото: Марина Лысцева/ТАСС

Туркия делегацияси Россия бош вазири ўринбосари Татяна Голикова билан ўтказилган музокараларда Германияга нисбатан қўлланилган хавфсиз туризм моделини таклиф қилди. Бу ҳақда Туркия маданият ва туризм вазири Меҳмет Нури Эрсўй маълум қилди.

«Россиялик туристлар асосан Анталю, Бодрум, Даламан ва Измирга боришади. Бу ҳудудларда коронавирус юқтириш кунлик кўрсаткичлари Туркия бўйича ўртача кўрсаткичдан 50 фоизга паст. Биринчи босқичда мана шу аэропортларга парвозларни бошлашни таклиф қиламиз», — деди у.

«Бу тизимни Германия билан йўлга қўйдик, у жуда муваффақиятли бўлди. Россия томонига ҳам шуни таклиф қилдик. Барчаси Россия ҳукумати қарорига боғлиқ», — дея қўшимча қилди Эрсўй.

Россия ҳукумати 15 апрелдан 1 июнгача Туркия билан авиақатновларни чеклаганди.  

Туркияда апрел-май ойларида коронавирус эпидемиясининг авж олиши ортидан мамлакат касаллик юқтиришлар сони бўйича дунёда бешинчи ўринга чиқди. 24 май ҳолатига Туркияда коронавирус юқтирганлар сони 5,18 млн нафарга етган.

Мамлакатда 29 апрелдан 17 майгача тўлиқ локдаун жорий этилганди. 

Мамлакат президенти Ражаб Тоййиб Эрдўған 17 май куни ҳукумат эпидемияни назорат остига олганини ва карантин режими юмшатилишини маълум қилди.

Top