17:27 / 05.07.2021
4115
Эрон ҳукумати аҳолини электр энергиясини камроқ сарфлашга чақирди

Мамлакатда электр энергиясига бўлган талаб ўтган йилдан буён камида 12 фоизга ошган.

Эрон энергетика вазирлиги аҳолини электр энергияси истеъмолини камайтиришга чақирди. Бу ҳақда Rudaw ахборот агентлиги хабар бермоқда.

"Кеча электр энергиясига бўлган талаб 65,9 минг МВтга етди, бу илгари ҳеч қачон кузатилмаган. Аммо ҳарорат кўтарилиши эҳтимоли ҳисобга олинса, бу кўрсаткич 66 минг МВтдан ошиши мумкин", - деди вазирлик матбуот котиби Мустафо Ражабий.

Унинг қайд этишича, мамлакатда электр энергиясига бўлган талаб ўтган йилдан буён камида 12 фоизга ошган.

Якшанба куни Эронда электр энергияси оммавий равишда ўчиши кузатилди. Бу ҳолат яна такрорланиши кутилмоқда.

Ражабий аҳолидан айниқса, куннинг  иккинчи ярмида электр истеъмолини камайтиришни сўради.

Эронда ҳукумат электр энергия инфратузилмасига бўлган юкламани пасайтиришга уринишига қарамасдан узилишлар бўлмоқда. Май ойида мамлакатда криптовалюта тўплаш тақиқланганди.

Top