Isroil Pfizer vaksinasining uchinchi dozasi bilan emlanishni tavsiya qiladi

Ushbu haftadan Isroil katta yoshli fuqarolarga BioNTech/Pfizer kompaniyasining koronavirusga qarshi vaksinasi uchinchi dozasi bilan emlanishni taklif qiladi. Bu haqda Isroil sog‘liqni saqlash vazirligiga tayanib Financial Times xabar berdi.

Hozirda AQSh va Yevropa davlatlari «delta-shtamm»ga qarshi kurashish uchun uchinchi vaksinani olish maqsadga muvofiqligini muhokama qilmoqda.

Isroil kasallikning dastlabki ikki to‘lqinini muvaffaqiyatli jilovlay oldi va dunyodagi eng samarali vaksinatsiya kampaniyasini o‘tkazdi. Bugunga qadar mamlakatning 9 mln nafar fuqarosidan 5 mln nafari to‘liq emlab bo‘lingan.

Ammo koronavirusning tajovuzkor «delta» shtammi paydo bo‘lganidan so‘ng vaziyat yana keskinlashdi: sutkalik kasallik holatlari 400dan oshmoqda.

O‘tgan haftada Pfizer kompaniyasi koronavirusga qarshi yanada kuchli immunitet hosil bo‘lishi uchun vaksinaning uchinchi dozasi bilan emlash zarurligi haqida ma'lum qilmoqchi ekani xabar berilgandi.