Исроил Pfizer вакцинасининг учинчи дозаси билан эмланишни тавсия қилади

Ушбу ҳафтадан Исроил катта ёшли фуқароларга BioNTech/Pfizer компаниясининг коронавирусга қарши вакцинаси учинчи дозаси билан эмланишни таклиф қилади. Бу ҳақда Исроил соғлиқни сақлаш вазирлигига таяниб Financial Times хабар берди.

Ҳозирда АҚШ ва Европа давлатлари «дельта-штамм»га қарши курашиш учун учинчи вакцинани олиш мақсадга мувофиқлигини муҳокама қилмоқда.

Исроил касалликнинг дастлабки икки тўлқинини муваффақиятли жиловлай олди ва дунёдаги энг самарали вакцинация кампаниясини ўтказди. Бугунга қадар мамлакатнинг 9 млн нафар фуқаросидан 5 млн нафари тўлиқ эмлаб бўлинган.

Аммо коронавируснинг тажовузкор «дельта» штамми пайдо бўлганидан сўнг вазият яна кескинлашди: суткалик касаллик ҳолатлари 400дан ошмоқда.

Ўтган ҳафтада Pfizer компанияси коронавирусга қарши янада кучли иммунитет ҳосил бўлиши учун вакцинанинг учинчи дозаси билан эмлаш зарурлиги ҳақида маълум қилмоқчи экани хабар берилганди.