KXShT Tojikistonga Afg‘oniston bilan chegaradagi vaziyat keskinlashgan taqdirda yordam beradi

Kollektiv xavfsizlik shartnomasi tashkilotiga a'zo davlatlar Afg‘oniston bilan chegaradagi vaziyat keskinlashgan taqdirda Tojikistonga yordam beradi. Bu haqda KXShT bosh kotibi Stanislav Zas ma'lum qildi.

Uning ta'kidlashicha, Afg‘onistondagi vaziyat KXShTni tashvishga solmoqda.

“KXShTga a'zo barcha davlatlar yagona fikrda va umumiy pozitsiyani yana bir bor tasdiqladi. Janubiy chegaralardagi vaziyat keskinlashgan taqdirda KXShT Tojikistonga barcha zarur harbiy va diplomatik yordamni beradi”, – dedi Zas.

U shuningdek, KXShT jahon hamjamiyatini Afg‘oniston aholisiga gumanitar yordamni kengaytirishga chaqirishini aytdi.

“KXShTga a'zo mamlakatlarning qo‘shma bayonotida jahon hamjamiyati afg‘on xalqiga gumanitar yordamni kengaytirishga chaqirildi”, – dedi tashkilot bosh kotibi.