Avgust oyida o‘zbekistonliklarning uy sotib olish ko‘rsatkichi 20,6 foizga oshgan

Iqtisodiy tadqiqotlar va islohotlar markazi tahlillariga ko‘ra, joriy yilning avgust oyida O‘zbekistonda ko‘chmas mulk oldi-sotdisi bo‘yicha 21,8 ming dona shartnoma rasmiylashtirilgan. Bu iyul oyiga (18,1 ming) nisbatan 20,6 foizga ko‘p. Shu bilan birga, 2020 yilning mos davriga (15,6 ming) nisbatan o‘sish 39,5 foizni tashkil etmoqda.

Joriy yilning iyul oyiga nisbatan barcha hududlarda o‘sish kuzatilgan.

Xususan, ko‘chmas mulk oldi-sotdisining eng yuqori o‘sish sur'atlari Buxoro (37,4 foiz), Qashqadaryo (33,1 foiz), Andijon (31,5 foiz) va Surxondaryo (25,9 foiz) viloyatlarida qayd etilgan.

Ko‘chmas mulk bozorida bitimlar soni ko‘payishining asosiy sabablari sifatida epidemiologik vaziyatning yaxshilanishi va iqtisodiyotga bosim o‘tkazadigan karantin cheklovlarining yengillashtirilishi, ommaviy emlash, ta'til mavsumining tugashi va faol ish mavsumining boshlanishi kabi omillar ko‘rsatilgan.