Chexiyada yangi bosh vazir tayinlandi

Chexiya prezidenti Milosh Zeman Fuqarolik demokratik partiyasi yetakchisi Petr Fialani mamlakatning yangi bosh vaziri etib tayinladi.    

Bosh vazirni tayinlash marosimi prezident saroyi Lanuda joriy haftada Zemanda koronavirus aniqlangani sababli qat'iy xavfsizlik choralariga amal qilingan holda o‘tgan. Jumladan, zalning Zeman joylashgan qismi oynavand to‘siq bilan ihotalangan.

Yangi vazirlar mahkamasi qachon tayinlanishi hozircha noma'lum, biroq Fiala Zemanga hukumatning ehtimoliy tarkibini taqdim qilgan.

Fiala uning hukumati o‘z zimmasiga javobgarlikni olib, mamlakatdagi dolzarb muammolarga, jumladan energetika inqirozi, inflatsiya va koronavirusga qarshi kurashishga tayyorligini bildirgan.

Zeman joriy haftada uzoq muddatli davolanishdan keyin shifoxonadan chiqarilgandi, biroq koronavirusga musbat test topshirgani sababli o‘sha kuniyoq yana u yerga qaytarilgandi.

57 yoshli Petr Fiala Fuqarolik demokratik partiyasi yetakchisi hisoblanadi. Bungacha u ta'lim, yoshlar va jismoniy tarbiya vaziri lavozimini egallagan, 2013 yildan Chexiya prezidenti deputati sifatida faoliyat yuritadi.

Chexiyada 8-9 oktyabrda parlament saylovlari bo‘lib o‘tgandi va uning natijalariga ko‘ra liberal kuchlar koalitsiyasi “Birgalikda” g‘alaba qozongandi. Ushbu koalitsiya tarkibiga Fuqarolik demokratik partiyasi, TOR 09 harakati va Xristian-demokratik harakat kiradi. 2-o‘rinni endilikda sobiq bosh vazir Andrey Babishning ANO harakati egallagan.

11 noyabrda Babish boshchiligidagi hukumat iste'foga chiqqan.