Yevropa sudi Polshaga migrantlarni Belarusga qaytarishni taqiqladi

Yevropaning inson huquqlari bo‘yicha sudi Polsha hududiga Belarusdan o‘tgan migrantlar ortga qaytarilmasligi kerakligi haqida qaror chiqardi. Bu haqda sudga tayanib RIA “Novosti” xabar berdi.

Sud 2021 yil avgustdan beri Polsha va Belarus chegarasidagi migratsiya inqirozi doirasida qo‘llangan choralar bo‘yicha 198 kishi topshirgan 47 ta arznomani ko‘rib chiqqan. Ularning aksariyati Polshaga, yana uchtasi Latviya va Litvaga qarshi berilgan.

Yevropa sudida ta'kidlanishicha, shikoyatchilarning aksariyati Polshada qolayotganlarini ta'kidlashgan va Belarusga qaytarilmasliklarini so‘rashgan. Migrantlar Belarusga yoki o‘z vatanlariga qaytarilsalar, hayotlari xavf ostida qolishi mumkinligidan xavotirlanishmoqda.

“Sud 39-qoidani qo‘llab, shikoyatchilar haqiqatan ham Polsha hududida qolayotgan bo‘lsalar, unda Polshadan chiqarib yuborilmasliklari kerakligi haqida qaror chiqardi”, deb ta'kidlab o‘tilgan sudda.

Varshava o‘z hududiga Belarusdan o‘tgan migrantlarni qabul qilishga qarshi chiqmoqda. Aksariyati Yaqin Sharq davlatlaridan bo‘lgan migrantlarning ko‘pchiligi ham Polshada qolishni istamayotganlari, ular Germaniya yoki Yevropa ittifoqining boshqa davlatlariga intilayotganlarini aytishmoqda. Biroq 2013 yilda qabul qilingan Dublin reglamentiga ko‘ra, Yevropa ittifoqi hududiga o‘tgan migrantlar ittifoqning qaysi davlati chegarasini birinchi kesib o‘tgan bo‘lsa, o‘sha davlatdangina boshpana so‘ray oladi.