Европа суди Польшага мигрантларни Беларусга қайтаришни тақиқлади

Европанинг инсон ҳуқуқлари бўйича суди Польша ҳудудига Беларусдан ўтган мигрантлар ортга қайтарилмаслиги кераклиги ҳақида қарор чиқарди. Бу ҳақда судга таяниб РИА “Новости” хабар берди.

Суд 2021 йил августдан бери Польша ва Беларусь чегарасидаги миграция инқирози доирасида қўлланган чоралар бўйича 198 киши топширган 47 та арзномани кўриб чиққан. Уларнинг аксарияти Польшага, яна учтаси Латвия ва Литвага қарши берилган.

Европа судида таъкидланишича, шикоятчиларнинг аксарияти Польшада қолаётганларини таъкидлашган ва Беларусга қайтарилмасликларини сўрашган. Мигрантлар Беларусга ёки ўз ватанларига қайтарилсалар, ҳаётлари хавф остида қолиши мумкинлигидан хавотирланишмоқда.

“Суд 39-қоидани қўллаб, шикоятчилар ҳақиқатан ҳам Польша ҳудудида қолаётган бўлсалар, унда Польшадан чиқариб юборилмасликлари кераклиги ҳақида қарор чиқарди”, деб таъкидлаб ўтилган судда.

Варшава ўз ҳудудига Беларусдан ўтган мигрантларни қабул қилишга қарши чиқмоқда. Аксарияти Яқин Шарқ давлатларидан бўлган мигрантларнинг кўпчилиги ҳам Польшада қолишни истамаётганлари, улар Германия ёки Европа иттифоқининг бошқа давлатларига интилаётганларини айтишмоқда. Бироқ 2013 йилда қабул қилинган Дублин регламентига кўра, Европа иттифоқи ҳудудига ўтган мигрантлар иттифоқнинг қайси давлати чегарасини биринчи кесиб ўтган бўлса, ўша давлатдангина бошпана сўрай олади.