Qozog‘istonga xorij fuqarolarining kirishi vaqtinchalik to‘xtatildi

Mamlakatda 19 yanvarga qadar favqulodda holat rejimi joriy etilgan.

Foto: RIA Novosti

Qozog‘istonda favqulodda vaziyat e’lon qilinganligi sababli mamlakatga xorij fuqarolarining kirishi vaqtinchalik to‘xtatildi. Bu haqda RIA Novosti Qozog‘istonning Toshkentdagi elchixonasi vakiliga asoslanib xabar berdi.

"Favqulodda holat e’lon qilingani munosabati bilan hozircha Qozog‘iston hududiga xorij fuqarolarining kirishi to‘xtatildi. Xususan, piyoda, aviaparvoz yoki boshqa turdagi transport orqali ham", - degan elchixona vakili.

Eslatib o‘tamiz, Qozog‘istonda 2 yanvarda boshlangan norozilik namoyishlari ommaviy tartibsizliklarga aylanib ketdi.

Mamlakat prezidenti Qosim-Jo‘mart To‘qayev mamlakatda favqulodda holat e’lon qildi.

Avvalroq Qozog‘istonda tartibni saqlash va obektlarni qo‘riqlashda yordam berish uchun KXShT tinchlikparvar kuchlari yetib kelgani xabar qilingandi. Tinchlikparvar kuchlar tarkibiga Rossiya, Belarus, Armaniston, Tojikiston va Qirg‘iziston qurolli kuchlari bo‘linmalari kiritilgan.

Tayyorlagan Дилшод Аскаров

#chegara #Qozog‘iston

2 yanvar kuni Qozog‘istonning Mang‘istau oblastida suyultirilgan gaz narxi ikki baravarga ko‘tarilganidan norozi bo‘lgan qozog‘istonliklar ommaviy mitingga chiqishdi va keyingi kunlarda namoyishlar butun mamlakat bo‘ylab yoyildi.