KXShT kotibiyati qo‘shinlar Qozog‘istondan 10 kun davomida olib chiqib ketilishini tasdiqladi

Qozog‘iston prezidenti Qosim-Jo‘mart To‘qayev KXShT bosh kotibi Stanislav Zas bilan uchrashdi.

Foto: TASS

Qozog‘istondan KXShT qo‘shinlarini olib chiqib ketish 13 yanvarda boshlanadi va 10 kun ichida yakunlanadi, deb ma’lum qildi KXShT matbuot kotibi Vladimir Zaynetdinov.

"12 yanvar kuni Qozog‘iston prezidenti Qosim-Jo‘mart To‘qayev Nur-Sultonda KXShT bosh kotibi Stanislav Zasni qabul qildi. Qozog‘iston rahbari ittifoqchilarga tinchlikparvarlik operatsiyasi o‘tkazgani va terrorchilik hujumi sharoitida ko‘maklashgani uchun minnatdorlik bildirdi. Qozog‘iston prezidenti KXShT tinchlikparvarlik missiyasi yakunlanganini e’lon qildi", - dedi u.

Zaynetdinovning so‘zlariga ko‘ra, Qozog‘istondan KXShT qo‘shinlarini olib chiqib ketish 13 yanvarda boshlanadi va 10 kun ichida nihoyasiga yetadi.

Qozog‘istonda ommaviy norozilik namoyishlari tartibsizliklarga aylanib ketganidan so‘ng To‘qayev KXShTga tinchlikparvar kuchlar kiritilishini so‘rab murojaat qilgandi. Ma’lumotlarga ko‘ra, Qozog‘istonga 2030 nafar tinchlikparvarlik kuchlari xizmatchilari va 250 dona texnika kiritilgan.

Tayyorlagan Дилшод Аскаров

#KXShT #Qozog‘iston

2 yanvar kuni Qozog‘istonning Mang‘istau oblastida suyultirilgan gaz narxi ikki baravarga ko‘tarilganidan norozi bo‘lgan qozog‘istonliklar ommaviy mitingga chiqishdi va keyingi kunlarda namoyishlar butun mamlakat bo‘ylab yoyildi.