Yil oxirigacha O‘zbekistonda milliy ijtimoiy tarmoq va messenjerlar yaratiladi

2021 yilda axborot sohasini tartibga solish yuzasidan bir qancha loyihalar amalga oshiriladi. Bu – “2022–2026 yillarga mo‘ljallangan Yangi O‘zbekistonning taraqqiyot strategiyasi to‘g‘risida” prezident farmonida belgilangan.

Strategiyada 2022 yil dekabr oyigacha fuqarolarning shaxsiy ma’lumotlarini himoyalash maqsadida zamonaviy kommunikatsion dasturlar hamda milliy ijtimoiy tarmoq va messenjerlar yaratish nazarda tutilgan.

Yaratilgan dastur hamda milliy ijtimoiy tarmoq va messenjerlar auditoriyasining qamrovi ortishiga qarab soliq imtiyozlarini berish tizimi yo‘lga qo‘yiladi.

Milliy ijtimoiy tarmoq va messenjerlar davlat budjeti hamda homiylar va maqsadli jamg‘armalar mablag‘lari hisobidan yaratilishi ko‘zda tutilgan.

Loyihani amalga oshirishga Axborot texnologiyalari vazirligi hamda “Kiberxavfsizlik” DUK mas’ul qilib tayinlandi. Xavfsizlik kengashi kotibining birinchi o‘rinbosari Eldor Aripov va Bosh vazir maslahatchisi – IT-texnologiyalar telekommunikatsiyalar va innovatsion faoliyatni rivojlantirish masalalari departamenti boshlig‘i loyiha ijrosi ustidan nazorat qiladi.

Shuningdek, shaxsiy va sir saqlanishi lozim bo‘lgan ma’lumotlarni Internet tarmog‘ida oshkor qilish bilan bog‘liq daxlsizlik huquqlari buzilishining oldini olish maqsadida Jinoyat va Ma’muriy javobgarlik to‘g‘risidagi kodekslarning daxlsizlik huquqlari bilan bog‘liq moddalariga tegishli qo‘shimcha va o‘zgartirishlar kiritiladi.

Bundan tashqari, 2022 yil noyabr oyiga qadar axborot sohasini tartibga soluvchi yagona tizimlashtirilgan normativ-huquqiy hujjat – Axborot kodeksi loyihasi ishlab chiqiladi.

Fuqarolarning axborot kommunikatsiya vositalaridan foydalanish madaniyatini oshirish maqsadida, turli yosh toifasi uchun mo‘ljallangan o‘quv kurslari hamda onlayn dasturlarni ommalashtirish nazarda tutilgan.

Shu bilan birga, 2023-2026 yillarga mo‘ljallangan O‘zbekistonning kiberxavfsizlik strategiyasi ishlab chiqiladi hamda kiberjinoyatchilik uchun jinoiy javobgarlik qayta ko‘rib chiqiladi.

“Kibernetikada innovatsiyalar IT-parki”da yoshlarning kiberxavfsizlik asoslari bo‘yicha o‘qitilishini ta’minlash, hamda har yili talaba va o‘quvchilar orasida kiberhujumlarni aniqlash bo‘yicha respublika miqyosida konkurslar o‘tkazish ko‘zda tutilmoqda.