Zelenskiy Ukrainani tark etgan deputatlarga qaytish uchun 24 soat vaqt berdi

Ma’lumotlarga ko‘ra, 23 nafar deputat Ukraina tashqarisida. Mamlakatni shuningdek, tadbirkorlar tark etayotgani xabar qilingan. 13 fevral kuni Kiyevdan 20ta charter reys uchib ketgan.

Foto: president.gov.ua

Davlat biznesga ta’sir o‘tkaza olmaydi va o‘tkazmaydi. Ukraina prezidenti mamlakatdan yirik biznesmenlarning chiqib ketishiga ana shunday fikr bildirdi.

«Ular o‘zlari uchun hukm chiqarib bo‘lishdi deb o‘ylayman, ammo ular o‘n minglab odamlar ishlayotgan o‘z korxonalariga qaytishlari kerak deb hisoblayman», — deya ta’kidladi u.

Zelenskiy shuningdek, xorijga chiqib ketgan oliy rada deputatlarini 24 soat ichida mamlakatga qaytishga chaqirdi. Uning so‘zlariga ko‘ra, aks holda davlat «jiddiy xulosa chiqarishiga» to‘g‘ri keladi.

Avvalroq, «Ukrainskaya pravda» nashri 23 nafar deputat mamlakat tashqarisida ekanligini xabar qilgandi.

Gazeta shuningdek, Ukrainani tadbirkorlar tark etayotgani, birgina 13 fevral kuni Kiyevdan 20ta charter reys uchib ketganini yozgan.

Tayyorlagan: Дилшод Аскаров

#Ukraina #Volodimir Zelenskiy