17:22 / 16.04.2022
20952
Путин ва Саудия Арабистони валиаҳд шаҳзодаси нефт бозори ва Украинани муҳокама қилди 

Хабар қилинишича, томонлар Россия ва Саудия Арабистони ўртасидаги ўзаро манфаатли алоқаларни янада ривожлантиришга келишиб олган. 

Фото: Anadolu Agency

Россия президенти Владимир Путин Саудия Арабистони валиаҳд шаҳзодаси Муҳаммад бин Салмон Ал Сауд билан телефон орқали мулоқот қилди. Бу ҳақда “Онадўлу” агентлиги Кремл матбуот хизматига таяниб хабар берди.

Хабарда айтилишича, томонлар кун тартибидаги халқаро масалалар, хусусан, Украина ҳамда Ямандаги вазият бўйича фикр алмашди.

"Жаҳон нефт бозоридаги барқарорликни таъминлашга қаратилган "ОПЕК плюс" шаклидаги ҳамкорлик ижобий баҳоланди", - дейилади хабарда.

Қўшимча қилинишича, мулоқот давомида икки томонлама ҳамкорликнинг долзарб масалалари кўриб чиқилди.

“Томонлар Россия ва Саудия Арабистони ўртасидаги ўзаро манфаатли алоқаларни янада ривожлантиришга келишиб олди”, деб маълум қилган Кремл матбуот хизмати. 

Мавзу
Украина инқирози
2021 йил давомида Россия Украина билан чегарада қўшин тўплади. Сўнгги вақтларда минтақада вазият кескинлашмоқда.
Барчаси
Top