Mahatma Gandining nabirasi Hindiston prezidentligiga nomzodini ko‘rsatmasligini ma’lum qildi 

Mahatma Gandining nabirasi, G‘arbiy Bengaliya shtatining sobiq gubernatori Gopalkrishna Gandi muxolifatning Hindiston prezidentligiga saylovlarda nomzodini ko‘rsatish to‘g‘risidagi taklifini rad etdi. 

"Muxolifatning qator hurmatli yetakchilari mening nomzodimni bo‘lajak prezidentlik saylovida ilgari surish taklifi bilan chiqishdi. Ularga minnatdorlik bildiraman. Ammo masalani chuqur o‘rganib chiqib, muxolifat nomzodi milliy konsensus va milliy muhit yarata oladigan shaxs bo‘lishi kerak degan fikrga keldim. Buni mendan ko‘ra yaxshiroq amalga oshira oladiganlar topilishini sezyapman. Shuning uchun yetakchilardan ana shunday insonga imkoniyat berishlarini so‘radim", - deyiladi Gandining bayonotida. 

Gopalkrishna Gandi 2017 yilda Hindiston vitse-prezidentligiga nomzod etib ko‘rsatilgan, ammo saylovda amaldagi vitse-prezident Venkaye Nayduga mag‘lub bo‘lgandi. 

Hindistonda prezidentlik saylovi 18 iyul kuni o‘tkazilishi belgilangan.