AQSh Rossiyaning bir necha yuz milliard dollarlik aktivlarini muzlatdi

O‘tgan 100 kun ichida AQSh Rossiyaning 330 milliard dollarlik aktivlarini muzlatdi yoki blokladi. Bu haqda AQSh moliya vazirligi ma’lum qildi.

Qayd etilishicha, sanksiyalarga tushgan rossiyaliklarning 30 milliard dollardan ortiq miqdordagi aktivlari muzlatilgan yoki bloklangan. Shuningdek, Rossiya markaziy bankining 300 milliard dollarga yaqin aktivlari bloklangan.

Rossiya aktivlarini qidirib topish bo‘yicha xalqaro guruh yuzlab milliard dollarlik aktivlarni muzlatish borasidagi ishini hali yakunlagani yo‘q, deyiladi vazirlik xabarida. 

«Rossiya elitasi, ishonchli shaxslari va oligarxlari» (REPO) deb nomlanuvchi ishchi guruhga Avstraliya, Buyuk Britaniya, Germaniya, Italiya, Kanada, Fransiya, Yaponiya va Yevrokomissiya vakillari kiradi.