YeI Rog‘un GESi qurilishiga investitsiya kiritadi 

Yevroittifoq Tojikistondagi Rog‘un gidroelektrostansiyasi qurilishining asosiy investori bo‘ladi, deb xabar berdi Reuters agentligi. 

Yevropa investitsiya banki (YeIB) Italiyaning Webuild qurilish kompaniyasi olib borayotgan GES qurilishiga haligacha mablag‘ ajratmagan, ammo ushbu haftada Yevrokomissiya bankdan loyihaning «yirik investori» bo‘lishni iltimos qildi, deb xabar qilgan agentlikka bank vakili. 

YeIB vakili bo‘lajak investitsiyalarning miqdori va sababi to‘g‘risidagi savollarga javob bermagan. Ismini aytishni istamagan yevropalik amaldorlardan birining aytishicha, YeI Markaziy Osiyoning Rossiya energiyasiga qaramligini kamaytirish uchun Tojikistondagi Rog‘un gidroelektrostansiyasi qurilishining asosiy investori bo‘lishni xohlamoqda. 

YeI «Markaziy Osiyoning Rossiyaga energetik qaramligiga barham bermoqchi», deb ta’kidlagan u. 

Rog‘un GESi qurilishi 2016 yildan buyon davom etmoqda. Loyiha qiymati 8 mlrd dollar atrofida bo‘lib, undan 3 mlrd dollari ishlatildi, degan Tojikiston energetika vaziri Daler Juma. 

Loyiha asosan Tojikiston davlat obligatsiyalari va xususiy qarzlar hisobiga moliyalashtirilgan. 

Loyihaga ko‘ra, GES har birining quvvati 600 mVtni tashkil etuvchi oltita agregatdan iborat bo‘ladi. Stansiya tosh-shag‘al to‘g‘onining balandligi 335 metrni tashkil etadi. U dunyodagi eng baland to‘g‘on bo‘lishi kutilyapti.