Vazir: “O‘zbekiston 2026 yilda TOP-50 innovatsion davlatlar qatoriga kirishi maqsad qilingan”

Bugun, 5 avgust kuni 2022-2026 yillarda O‘zbekistonning innovatsion rivojlanish strategiyasiga bag‘ishlangan matbuot anjumani o‘tkazildi. Unda innovatsion rivojlanish vaziri Ibrohim Abdurahmonov taqdim etilayotgan strategiya bo‘yicha bajariladigan ishlar haqida ma’lumot berdi.

Tadbirda aytilishicha, ishlab chiqilgan yangi strategiyada O‘zbekiston 2026 yilda TOP-50 innovatsion davlatlar qatoridan joy egallashi asosiy maqsad etib belgilangan. Shuningdek, hududlarda 224 ta, tarmoqlarda 441 ta, oliygohlar va ilmiy tashkilotlarda 1 086 ta loyihani amalga oshirish rejalashtirilgan.

Vazir hozirga qadar bajarilgan ishlarga ham to‘xtaldi. Unga ko‘ra, hozir tarmoq va oliygoh/ilmiy tashkilotlar kesimida jami 1 751 ta innovatsion loyiha shakllantirilgan. Hududlar kesimida 2 507 ta ish o‘rni yaratiladigan 206 mlrd so‘mlik 224ta loyiha amalga oshirilmoqda.

Tarmoqlar kesimida ilmiy-innovatsion mahsulotlar ishlab chiqarilishi belgilangan 26 ta tarmoq tashkilotining 6,6 trln so‘mlik 265 ta loyihasi; iqtisodiyot tarmoqlarida amalga oshiriladigan 33 trln so‘mlik 176 turdagi innovatsion mahsulotlarni seriyalab ishlab chiqarish va texnologiyalar o‘zlashtirilishi nazarda tutilgan “drayver” loyihalar shakllantirilgani aytildi.

Eslatib o‘tamiz, O‘zbekistonning innovatsion rivojlanish bo‘yicha 5 yillik strategiyasi o‘tgan oyda prezident farmoni bilan tasdiqlandi.