Yod va vitaminlar bilan bepul ta’minlash 100 foizga yetkaziladi

“O‘zbekiston – 2030” strategiyasi loyihasida ona va bola salomatligini mustahkamlash hamda profilaktik tadbirlarni kuchaytirish doirasida aholining muayyan guruhlarini yod va vitamin-mineral qo‘shimchalari bilan to‘liq qamrab olish maqsad qilingan. Loyihaga ko‘ra, 3–15 yoshdagi bolalar hamda 15–35 yoshdagi xotin-qizlar ko‘rsatmaga muvofiq 100 foiz bepul ta’minlanishi rejalashtirilmoqda.

Strategiya loyihasiga muvofiq, sog‘lom bolalikni ta’minlash va aholi salomatligini profilaktika orqali mustahkamlash maqsadida mikronutriyentlar bilan ta’minlash choralari kengaytiriladi. Xususan, 3–15 yoshdagi bolalarni yod preparati bilan, 15–35 yoshdagi xotin-qizlarni esa polivitamin, temir va foliy kislotasi bilan ko‘rsatmaga muvofiq 100 foiz bepul ta’minlash rejalashtirilgan.

Loyihada mazkur tashabbus onalar va bolalar o‘limini kamaytirish, bolalar o‘rtasida kasallanish holatlarini qisqartirish hamda umumiy salomatlik ko‘rsatkichlarini yaxshilashga qaratilgan choralar paketi doirasida qayd etilgan. Shu yo‘nalishda bolalar orasidagi yuqumli va yuqumli bo‘lmagan kasalliklarni 10 foizga qisqartirish, go‘daklar o‘limini 6,5 promillegacha, besh yoshgacha bo‘lgan bolalar o‘limini esa 9 promillegacha kamaytirish maqsadlari ham belgilangan.

Qo‘shimcha ravishda, 6–23 oylik bolalarni mikronutriyent kukuni bilan ko‘rsatmaga muvofiq 100 foiz bepul ta’minlash, 2–10 yoshli bolalar orasida gelmintozni 15 foizga qisqartirish choralari ham loyihada nazarda tutilgan. Shuningdek, tug‘uruq xizmatlari qamrovini kengaytirish maqsadida tug‘uruq o‘rinlari sonini 14 373 taga oshirish rejalashtirilmoqda.

Mazkur chora-tadbirlar aholi guruhlarini zarur mikroelementlar va vitaminlar bilan ta’minlash orqali sog‘liqni saqlashda profilaktikaning ahamiyatini oshirish, ona-bola salomatligini mustahkamlash hamda sog‘lom avlodni tarbiyalashga xizmat qilishi ko‘zda tutilgan.