Bayden noyabrda Si Jinping bilan uchrashishi mumkin

AQSh prezidenti Jo Bayden noyabrda XXR rahbari Si Jinping bilan uchrashuv o‘tkazishi mumkin, deb xabar berdi Wall Street Journal gazetasi o‘z manbalariga tayanib.

"Xitoylik amaldorlar noyabrda Si Jinpingning Janubi-Sharqiy Osiyoga tashrifi va prezident Bayden bilan uchrashuvini rejalashtirmoqda", - deyiladi xabarda.

Qayd etilishicha, bu XXR rahbarining qariyb uch yil ichidagi birinchi safari va prezident Bayden bilan ilk uchrashuvi bo‘ladi.

Gazeta xabariga ko‘ra, Si Jinping 15-16 noyabr kunlari Balida bo‘lib o‘tadigan G20 sammitida qatnashishi, u yerdan Osiyo-Tinch okeani iqtisodiy hamkorligi sammitida ishtirok etish uchun Bangkokka yo‘l olishi mumkin.

"Si Jinping va Bayden uchrashishi ehtimoli ko‘zda tutilgan tashrifga tayyorgarlik ko‘rish hozircha boshlang‘ich bosqichda va o‘zgarishi ham mumkin", - deb yozadi gazeta.