2021 yil uchun BMT Inson taraqqiyoti indeksida O‘zbekiston - 101, Rossiya – 52, Ukraina – 77-o‘rinni egalladi.
2021 yilda turmush darajasi dunyoning o‘nta davlatidan to‘qqiztasida yomonlashdi. Birlashgan millatlar tashkilotining Taraqqiyot dasturi (BMTTD) tomonidan 8 sentabr, payshanba kuni e’lon qilingan Inson taraqqiyoti indeksi (Human Development Index, HDI) shundan dalolat beradi. Kompozit ko‘rsatkich inson taraqqiyoti hisobotlarining maxsus seriyasida qo‘llaniladi.
Ko‘rsatkichlar pasayib borayotgani ketma-ket ikkinchi yil kuzatilmoqda, deya ta’kidladi nemis diplomati, BMT Taraqqiyot dasturi loyihalari rahbari Axim Shtayner. «Biz har doim statistik ma’lumotlarni vaziyatga mos ravishda o‘zgartirishimiz mumkin. O‘zimizga berishimiz kerak bo‘lgan qiyin savol shunday - vaziyatni yaxshilash uchun nima uchun hech narsa qilmayapmiz?» -deya qo‘shimcha qildi u.
Yangi reytingga ko‘ra, Shveytsariya 2021 yilda 0,962 ko‘rsatkich bilan dunyoning eng rivojlangan davlati bo‘ldi. Ikkinchi va uchinchi qatorlarda - Norvegiya va Islandiya (0,961 va 0,959).
Germaniya 2015 yildan beri besh pog‘ona pastlab, 0,942 ball bilan to‘qqizinchi o‘ringa tushib ketdi.
1990 yilda indeksning birinchi nashrida yetakchilik qilgan Qo‘shma Shtatlar endi atigi 21-o‘rinda (0,921).
Rossiya (0,822) - HDI ro‘yxatining 52-qatorida, Ukraina (0,773) - 77-o‘rinda. O‘zbekiston - 101-pog‘onada.
«Biz suv toshqinlari, qurg‘oqchilik, yong‘inlar yoki pandemiya kabi holatda, muammolar juda og‘riqli bo‘lgan davrda yashayapmiz», dedi Shtayner. Indeks tuzuvchilari, shuningdek, butun dunyo bo‘ylab pessimizm kuchayganini qayd etishdi: respondentlarning yetti nafardan olti nafari kelajakka ishonchi yo‘qligini, uchdan bir qismi esa boshqa odamlarga ishonmasligini ta’kidladi.
Iyul oyida BMTTD jahon hamjamiyatini Rossiyaning Ukrainadagi urushi falokatli oqibatlarini bartaraf etish uchun birdamlikka chaqirdi. Shtaynerning so‘zlariga ko‘ra, BMT rezolyutsiyasi orqali maxsus jamg‘arma tashkil etilishi mumkin. Bu haqda batafsil gapirishga «hali biroz erta», deb tan olgandi o‘shanda diplomat va hozir barcha e’tibor «harbiy harakatlarni to‘xtatishga qaratilgan»ligini ta’kidlagan. «Shundan so‘ng biz rekonstruksiyani moliyalashtirish, jumladan, Rossiya hissasi haqida o‘ylaymiz», — dedi u. Shu bilan birga, Axim Shtayner nemis soliq to‘lovchilarini ham Kiyevni qo‘llab-quvvatlashga chaqirdi.
