Safarbarlikdan qochgan rossiyaliklar AQShdan boshpana so‘rashi mumkin

«Biz ularning millatidan qat’i nazar, AQShdan boshpana so‘rashi mumkin, deb hisoblaymiz. Har bir ariza alohida ko‘rib chiqiladi», deya aytib o‘tdi Oq uy matbuot kotibi.

AQSh rasmiylari «boshpana so‘ragan har qanday odamni» kutib oladi, deya qo‘shimcha qildi u. Biroq, uning so‘zlariga ko‘ra, bu - safarbarlikdan qochgan ruslarga boshpana berish uchun maxsus sharoitlar yaratiladi, degani emas.

Bundan oldin Qozog‘iston safarbarlikdan qochganlarni Rossiyaga topshirmasligi ma’lum bo‘lgandi. 

Bu haqda 27 sentabr, seshanba kuni Qozog‘iston ichki ishlar vaziri Marat Axmetjanov bayonotiga asoslanib, Orda nashri xabar berdi. 

Unga ko‘ra, Qozog‘iston rossiyaliklarni topshirishi mumkin, biroq bu jinoyat sodir etganlikda ayblanib, xalqaro qidiruvga berilganlargagina tegishli bo‘ladi.

O‘z navbatida, Qozog‘iston prezidenti Qosim-Jo‘mart To‘qayev Rossiyada Ukrainaga qarshi urush fonida e’lon qilingan «qisman safarbarlik» tufayli mamlakatga Rossiya fuqarolarining ommaviy ravishda kelayotgani to‘g‘risida ma’lum qildi.